Уақытқа тоқтам жоқ. Зырлаған секунд, зулаған минут сағаттарға ұласып, тәуліктер күн мен айға, ай жылдарға айналып, жаңадан ашылған тарихтың парағы апта сайын жабылып жатыр. Егемендік алғанына қуанған ел тәуелсіздіктің баянды болуы жолында тынбай еңбектенуде. Сырт көз кірпік қақпай қадағалап, қолымыздағы барымызды тартып алуға пейілді. Түк бермей, ештеңе алмай тағы отыра алмайсың. Ондайды қазекең: «Жатқан тастың астына су жүрмейді», – деп түйіндейді. Рас сөз. Бармасаң, келмесең, алмасаң, бермесең дегені тағы бар.
Жер бетіндегі 252 мемлекеттің арасында өзіндік жолын қалыптастырып, тыныштық пен тұрақтылықтың мекеніне айналған Қазақстан Республикасы тәуелсіздіктің алғашқы күнінен-ақ сыртқы қарым-қатынасты нығайтып, мемлекетаралық келісімшарттардың дұрыс жүруіне күш салды. Соның арқасында ғасырлар бойы ен-белгісіз жатқан жеріміздің шегарасын шегендеп, көршілес елдермен арадағы беймәлім межені белгіледік. Қазір Қазақстан шегарасының жалпы ұзындығы 13 394 шақырымға тең. Оның ішінде 2000 шақырымнан астамы Каспий теңізінде жатыр. Солтүстік-батысында Ресеймен 7591 шақырымға шектесетін еліміз Алтай тауынан Хантәңірі шыңына дейін созылып жатқан ҚХР-мен арадағы мемлекеттік шегара 1782 шақырым. Оңтүстігіміз Қырғызстанмен 1241 шақырымға шектессе, оңтүстік-батыстағы Өзбекстанмен арада 2354 шақырым бар. Батысымыздағы шегараның 426 шақырымы Түрікменстанмен түйіседі. Төрт тарапымызда шегарашыларымыз тас-түйін дайындықты пысықтауда. Бұның бәрі нақты әрі бұлтартпас құжат – «Қазақстан Республикасының Мемлекеттік шегарасы туралы» Заңымен бекітілген. Осының өзі еліміздің жеткен жетістігінен хабар берсе керек.
«Күніне тоқсан түрлі пәле жаусын, сонда да күдер үзбе бір Алладан» деп Жаратқаннан үмітін үзбеген қазақ халқын Хақ Тағала нешетүрлі қанды қырғыннан аман сақтап қалды. Қылышынан қаны тамған кеңестік идеологияның қуғынымен елімізде 40 мың адам атылып, айдалып кете барды. Жыл сайын 31 мамыр – Саяси қуғын-сүргін құрбандарын еске алу күніне орай ақтаңдақты күндерде соңғы демін шығарған боздақтардың рухына тағзым етеміз. Бүтіндей бір ұлттың сүт бетіне шығар қаймағындай асыл ұлдары – ұлт руханиятының ұстынына айналар шақта жан тәсілім етті. Алдарынан жарылқасын, иман байлығын берсін, кейінгіге шарапатын тигізсін деп тілейік. Олардың бәрі де елінің болашағы жарқын боларына үміт артты. Алаш арыстары көре алмаған жарқын болашақты бүгінгі сіз бен біз көріп, ел игілігінің күн санап артып келе жатқанына куә болудамыз. Мәдениетте, әдебиетте, нақты ғылымда да ұрпағымыздың жетер жетістігі мен алар асуы әлі алда. Өйткені, біз бойындағы барын толық сарқып бітпеген елміз. Парасат пен пайымға, салт пен санаға салмақ салатын сайыпқыран ұл-қыздарымыз көп бола берсін!
«Елу жылда – ел жаңа, жүз жылда – қазан» деген баба сөзінің сырына үңілсек, ынтымақ пен бейбітшілікте, береке мен бірлікте өмір сүрген мемлекеттің дамуы қарқын ала түсетінін байқау қиын емес. Ендеше, Қазақстан Республикасы Тәуелсіздігінің 30 жылдығы ғасырлар бойы аңсаған ата-бабамыздың асыл арманы орындалған күн!
М. ӘСЕТҰЛЫ
