Ауыл – ата-бабамыздың кіндік қаны тамған, маңдай тері төгілген киелі мекен. Ананың әлдиі, аялы алақаны қандай ыстық болса, ауыл да бізге сондайлық қымбат.
Қазақтың қай ауылына барсаң да, ғасырлардың куәсіндей әр жерде мәрмәрдай тау-тастары мен саялы бәйтеректерді кездестіресің. Біздің ауылымыздың да сондай тамырын терең жайған, жапырағы жайқалған бәйтеректері бар. Олар бұтақтарын кең жайып, жанға сая самалымен бауырында өскен балапандарын желпи түсіп, қанатының астына алып отырады.
Менің ауылым өте киелі. Бес батыры шыққан ұлы Аламандар ұрпағы мекен етеді. Сусынбай Қалмақбаев, Сейдахмет Қорғасбаев, Жұмақан Қорғанбаев, Молдақын Мүсірәлиев, Құрманәлі Төлебаев сияқты ұрпағына ұран болған, еңбегімен ер атанған бабаларымыз да біз үшін үлкен мақтаныш.
Ұлы Отан соғысына қатысып, тоғыз жерінен жараланса да зеңбірегінің түбінен кетпей жау танкісін жайратқан майдангер аталарымыздың ерлігі де бүгінгі ұрпақ жадында. Бейбіт заманда да қолына қалам ұстаған ақын-жазушыларымыздың, саналы ғұмырын жас ұрпаққа арнаған ұстаздардың қалдырған ізі мәңгілік! Олардың бәрі де табиғаты көркем, жаз жайлауы, сылдырап аққан мөлдір бұлағы, шашылып жатқан байлығы мол қазыналы мекен Ақтастыға бас иіп өтті емес пе?!
«Үш бұлақ» деп аталатын шипасы зор қасиетті бұлағымызды да айтпай кетуге болмайды. Жер-жерден емдік үшін суын алып кетіп жатқан адамдарда есеп жоқ. Оның жүрегі ауырған, көз жанары нашарлаған, тері ауруларына шалдыққан адамға пайдасы орасан. Мұнымен қатар Арасан, Қурайлы, Сарқырама бұлақтары қысы-жазы буы бұрқырап ағып тұрады.
Ақтасты ауылым әсем табиғатымен, биік тауларымен, қолмен құйып қойған мүсіндей алыстан көз тартарлық аппақ тастарымен дара мекен. Оның қасиетін сезініп өсу біз сияқты бақытты жандарға бұйырғаны шексіз бақыт.
Балжан НҰРБОЛҚЫЗЫ,
Ақтасты орта мектебінің оқушысы
Кеген ауданы
Сурет ғаламтордан алынды
