«Jetіsý medıa» ақпараттық алаңында облыс бойынша еңбек инспекциясы департаментінің мемлекеттік еңбек инспекторы Бауыржан Ормановтың қатысуымен «Жұмыс берушілер демалыс уақытына жалақыны қалай төлеуі керек?» тақырыбында баспасөз мәслихаты өтті.
Коронавирус инфекциясының таралуына байланысты, оның алдын алу мақсатында Еңбек және халықты әлеуметтік қорғау министрлігі төтенше жағдайды енгізу кезеңінде (16 наурыздан 15 сәуір аралығы) барлық жұмыс берушілерге әлеуметтік жауапкершілік білдіріп, қызметкерлердің қашықтықтан жұмыс істеуге 70 пайызы көшетіндігін айтқан.
Егер қызметкер карантинде болса: Барлық карантинге алынған жұмыскерлерге еңбекке уақытша жарамсыздық парағы беріледі. «Еңбекке уақытша жарамсыздық бойынша әлеуметтік жәрдемақы тағайындау және төлеу ережесін бекіту туралы» бұйрыққа сәйкес айына 15 АЕК (айлық есептік көрсеткіш) аспайтын мөлшердегі жалақы қарастырылған.
Қашықтықтан жұмыс істесеңіз: Бұл ретте жұмыс уақытын есепке алу, шығыстар мен еңбекақы екі жақтың келісімі бойынша жұмыс берушінің құзырында. Ал ондай жағдайда жұмыс беруші жұмыскердің нақты жұмыс істеген уақытына ақы төлейді.
Өз сөзінде Бауыржан Байғазыұлы: «Сондай-ақ, жұмыс берушіге және жұмыскерге байланысты емес себептер бойынша бос тұрып қалу уақытын рәсімдеу тәртібі және бос тұрып қалу уақытына ақы төлеу талаптары еңбек, ұжымдық шарттарда айқындалады және жалақының ең төмен мөлшерінен кем болмайтын мөлшерде (42 500 теңге) белгіленеді», – деп өндірісті тоқтату кезінде жұмыскерлерге төленетін жалақыға тоқталды.
Әзірге департаментке осы турасында арыз-шағым, ұсыныс түспеген.
Серік ҚАНТАЙ
