Еліміздің өркендеуі қоғамның ортақ мәселелерін бірлесе шешуге, түйткілді тақырыптарды ақылдаса, кеңесе отырып талқылауға тікелей байланысты. «Кеңесті жерде кемдік жоқ» дегенді айтқан бабалар сөзіне сенсек, әрбір істің жақсы нәтижесі алдын ала жасалған пайым, құрылған есеп, дайындалған жоба негізінде шығады. Сондықтан болар, ата-әжелеріміз: «Кеңесіп пішкен тон келте болмайды» деген мақалды жиі айтып отыратын. Расында бірнеше адамның ақылдасуымен, көпті көрген ақсақалды қарттардың білгенін мысалға алумен көптеген мәселенің шешімін табуға болады. Және оның дұрыс болып шығарына сенім мол.
Қазақстан Республикасында қоғамның өзекті мәселелерін бірлесе талқылау үшін Ұлттық қоғамдық сенім кеңесі құрылып, халықтың ішінен шыққан қоғам қайраткерлері мен белсенділер сөз арнайтын мінберге айналды. Осыған дейін екі рет отырыс өткізген Ұлттық кеңесте көпбалалы аналарға жәрдемақы тағайындау, мүгедектер мен мүмкіндігі шектеулі жандарға қолдау көрсету, рұқсат етілген митинг ұйымдастыруды ескерту қағидатын қалыптастыру, шетелдерден жұмыс күшін әкелуге қатысты заң нормаларына өзгертулер мен толықтырулар енгізу сынды еліміз үшін аса маңызды мәселелер талқыланды. Сол талқылаулардың нәтижесі бойынша бүгінгі күні көпбалалы отбасыларға берілетін мемлекеттік жәрдемақы ұлғайып, 4 баласы бар аналар 42 мың теңге, 5 балалы аналар 52500 теңге ала бастады. Бұл сома әр балаға орай өсіп отыр. Өткен жылы ғана 4 балалы ана небары 10500 теңге алып келсе, биыл ол төрт еселенді. Яғни, Ұлттық қоғамдық сенім кеңесінде көтерілген мәселенің нәтижесі осылайша көрініс тапқаны анық.
Ұлттық кеңестің екінші отырысында сөз алған Президент Қасым-Жомарт Тоқаев:
– Көпбалалы отбасыларға жаңа мемлекеттік жәрдемақыны дифференциалды, яғни, айлық есептік көрсеткіштің 42,5 мың теңгеден 74 мың теңгеге дейінгі еселенген өлшемімен беру ұсынылады. Сонымен қатар, жағдайы төмен отбасылардың балаларына кепілдендірілген әлеуметтік пакет жасақталады. Мектеп жасына дейінгі балалар азық-түлікпен және ең қажетті деген құрал-жабдықтармен қамтылады. Оқушылар мектепте ыстық тамақты тегін ішеді, мектепке барып-қайту жолақысы, сондай-ақ, мектеп формасы мен оқу құралдары тегін болады, – деп мәлімдегені күллі жұртшылыққа белгілі.
Міне, халықтың қамын ойлаудан туындаған жаңа бастама – Ұлттық қоғамдық сенім кеңесінің жұмысы елімізде осылай жүріп жатыр. «Жақсының жақсылығын айт – нұры тасысын» деген тәмсілді айтқан бабалар сөзіне сенсек, «Бітер істің басына, жақсы келер қасына».
Мәди АЛЖАНБАЙ
