Биыл облыстық аумақтық инспекциясының құрылғанына 20 жыл. Осыған орай Тіл сарайында облыс әкімінің орынбасары Серікжан Бескемпіровтің қатысуымен мерекелік жиын өтті.
Басқосуда облыстық аумақтық инспекция басшысы Саят Сақмолдин агроөнеркәсіптік кешендегі мемлекет саясатын жүзеге асыру, салаға қатысты заң талаптарының сақталуын қадағалау, асыл тұқымды мал және өсімдік шаруашылығын өркендету, фитосанитарлық іс-шараларды қамтамасыз ету жұмыстарына қысқаша тоқталды.
Облыс әкімінің орынбасары Серікжан Бескемпіров айтулы мерекемен сала ардагерлері мен қызметкерлерін құттықтады.
– Облыстық аумақтық инспекциясының құрылғанына аз ғана уақыт болса да нәтижелі қызмет көрсетіп келеді. Облыстағы мал шаруашылығына, ондағы жаңа селекциялық жетістіктердің орындалуына, астық нарығын реттеу, өсімдіктерді қорғау және өсімдіктер карантині саласындағы арнайы атқару мен қадағалау міндеттерін жүзеге асыру мақсатында сіңірген еңбектеріңізге зор алғысымды білдіремін. Нұрмұханбет Айтуғанов, Қуанышбек Жүйріктаев, Қадырбай Таджиев, Серік Аханов, Аңсар Мұсаханов, Ажар Қаджыбаева сынды білікті мамандардың ерен еңбегін ерекше атап, жастарға үлгі еткеніміз жөн. Бүгінгі таңда облыс аумағында мал тұқымын асылдандыратын 948 шаруашылық, 7 мал тұқымын асылдандыратын орталық және 6 дистрибьютерлік орталық пен 93 бағалаушы қызметі өз жұмысын жүргізіп келеді. 2019 жылдың 10 айлық көрсеткіші бойынша өндірілген өнімнің жиынтық мөлшері 718 млрд. теңгені құрады. Бұл өткен жылмен салыстырғанда әлдеқайда жоғары. Мұндай жетістікке жету үшін әрқайсыңыз тынбай еңбек еттіңіздер. Сондықтан да, баршаңызға мол табыс тілеймін, – деді Серікжан Іслямұлы.
Салтанатты басқосуда ауылшаруашылығы ғылымдарының кандидаты, ҚР Мемлекеттік сыйлығының лауреаты, ардагер Нұрмұханбет Айтуғанов ауылшаруашылығы саласындағы барша қызметкерді айтулы мерекемен құттықтап, еңбектеріне табыс тіледі.
Басқосу соңында облыстық аумақтық инспекция тарапынан облыс әкімінің орынбасары Серікжан Бескемпіровке, аталған салада еңбек еткен ардагерлерге, аудандық аймақтық инспекция басшылары мен қызметкерлеріне мерекелік медаль табыс етілді.
Еңлік КЕНЕБАЕВА
