Семей қаласында Абайдың «Жидебай-Бөрілі» мемлекеттік тарихи-мәдени және әдеби-мемориалдық қорық-музейінің ұйымдастыруымен «Ұлы даланың ұлы есімдері» тақырыбында республикалық ғылыми-тәжірибелік конференция өтті.
Шара «Қазақстанның аса көрнекті тұлғалары музейлері қауымдастығы» өкілдері ұйымдастырған «Тарих және Тұлға» көрмесінің салтанатты ашылуымен басталды.
Алғаш рет ұйымдастырылып отырған көрме хакім Абай, данышпан Шәкәрім, ғұлама Мұхтар сынды қазақ халқының көрнекті тұлғалары жайында сыр шертеді. Еліміздің әр өңірінен келген қонақтар мен зиялы қауым өкілдері қазақ елінің тарихында есімдері алтын әріптермен бедерленген баһадүр батырлар мен өнерпаздарымыздың, аса көрнекті тарихи тұлғалардың өмір жолы мен шығармашылығы, әдеби мұрасы, қоғамдық қызметіне қатысты жәдігерлермен танысты.
Аталған көрмеге Алматы облысынан М. Тынышпаев атындағы облыстық тарихи-өлкетану музейінің ұйымдастыруымен Ж. Жабаевтың, С. Аронұлының, Ү. Кәрібаевтың әдеби-мемориалды музейлерінен, Ақын Сара, М. Төлебаев, Н. Алдабергеновтің мемориалды музейлерінен, І. Жансүгіровтің әдеби музейінен 130-ға жуық құнды жәдігерден тұратын жылжымалы көрме қойылды.
Конференцияда ғылыми- танымдық баяндамалар көпшілік назарына ұсынылды. Осы орайда поэзияда Абай деңгейіне дейін көтеріле алған дарынды ақын, Жетісудың жарық жұлдызы І. Жансүгіровтің 125 жылдық мерейтойына орай «Жыр дүлдүлі» атты баяндамамды оқып, Абай еліне жерлестерім атынан ыстық лебізімді жеткізуді мақсат тұттым.
Шара барысында еліміздің түкпір-түкпіріндегі музейлер мен Абайдың «Жидебай-Бөрілі» мемлекеттік қорық-музейі арасындағы шығармашылық және ынтымақтастық байланысты арттыруға бағытталған меморандумға қол қойылды. Соған орай М. Тынышпаев атындағы облыстық тарихи-өлкетану музейі мен Абай музейі тығыз байланыста жұмыс жасап, республика көлемінде көрмелер мен мәдени шараларды ұйымдастыру мақсатын көздеп отыр.
Нұргүл Жауынбаева,
Ілияс Жансүгіров әдеби музейінің
меңгерушісі
