Премьер-Министр Асқар МАМИН Жамбыл ауданындағы «Империя Фуд» ЖШС-нің осы жылдың қаңтарында іске қосылған ет комбинатына келді. Үкімет басшысын аудан әкімі Бағдат Әлиев бастаған топ күтіп алып, жұмыс барысымен аталған серіктестік директоры Джавидан Арман Джавад таныстырды.
«Алматы-Бішкек» халықаралық күрежолының бойында қолайлы жерге салынған заманауи өндіріс орнына 3,4 млрд. теңге инвестиция салынған. Өндірістік қуаты жылына 8 мың тонна ет өңдейді, сондай-ақ 12 мың құты ет өнімдерін консервілеу желісі бар. Мұнда 80 адам еңбек етеді, орташа айлық жалақылары 200 мың теңге. Индустрияландыру картасы аясында «Бизнестің жол картасы – 2020» бағдарламасы бойынша 2017 жылы нысанға 85,8 млн. теңгеге электрмен және табиғи газбен жабдықтау желісі тартылған. Жыл басынан бері бұл серіктестіктен Иран мен Бахрейнге 75 тонна ет экспортталды. Шетелге шығарылатын еттің көлемін жыл соңына дейін 640 тоннаға жеткізу көзделіп отыр.
Бұдан соң Асқар Мамин осы серіктестіктің Үңгіртас селолық округінің аумағындағы бордақылау алаңына барды. Елді мекендерден алыс орналасқан орында малды семірту, жемшөбін дайындау жұмыстарының барысынан Джавидан Арман Джавад хабардар етті. Атшаптырым аумақтағы үш мың бас ірі қараға арналған нысанға 1,8 млрд. теңге инвестиция тартылып, 2015 жылы ашылған. Бүгінде мұнда 35 адам еңбек етеді, орташа айлықтары 130 мың теңге. Қазіргі кезде 2400 бас ірі қара бордақыда тұр.
Өткен жылы бұл жерден 673 тонна ет өткізілсе, одан бері өндіріс көлемі артып, биылғы 7 айдың өзінде 626 тонна ет өткізілді. «Империя Фуд» ЖШС-не тиесілі ауылшаруашылық жерінің көлемі 5879 гектар, оның 142,7-сі суармалы, 803,4-і тәлімі, 4909,3 гектары жайылым. Ауылшаруашылық техникасының саны — 10.
Серік САТЫБАЛДИЕВ
Жамбыл ауданы
Сурет ғаламтордан алынды
