Мемлекет басшысы Қасым-Жомарт Тоқаевтың «Білім және ғылым» атты республикалық тамыз конференциясына қатысып, оқыту жүйесіне баса көңіл бөлгендігі мектебіміздегі мұғалімдер ұжымын қатты қуантты.
Оның Үкіметке жүктеген міндеттерінің білім беруге деген көзқарасты түбегейлі өзгертетіні анық. Президент өз сөзінде ұлт ұстазы Ахмет Байтұрсыновтың «Біз әуелі елді түзетуді бала оқыту ісін түзетуден бастауымыз керек» деген айшықты ойын қолдануын аса көрегендік деп ойлаймын. Ұлағатты ұрпақ тәрбиелеу аса жауапты әрі күрделі іс екенін атап өткен Президент мұғалім еңбегін бағалаудың өте маңызды міндет болып табылатынын айтты. Сөзінде ерекше тоқталған 8 мәселе бүгінгі күн талабынан шыққан, жедел атқарылуы тиіс шаралар екені сөзсіз.
Мемлекет басшысының мектептердің материалдық базасының талапқа сай болуын, жас ұрпақ бойына білім мен ұлттық құндылықтарды қатар дарытуды, соңғы үлгідегі оқу ошақтарын салу арқылы үш ауысымды жоюды, үштілді жүйеге көшуді оқытушылардың дайындығына қарай жүзеге асыруды және білім саласына енгізілетін барлық реформаларды көпшілікпен кеңесіп, талқылап барып енгізуді ұсынғаны көңілімнен шықты. Әлеуметтік жағдайы төмен отбасы балаларына облыстан бөлінетін гранттар санын көбейте отырып, жұмыспен қамту да назардан тыс қалмады. Сонымен қатар, «Педагог мәртебесі туралы» Заңның жуықта күшіне енетіні бізді қуантады. Президент тапсырмасы Үкімет әзірлеп жатқан 2025 жылға дейінгі білім мен ғылымды дамытудың мемлекеттік бағдарламасында толық қамтылатынына сенемін. Осындай қолдауды көріп отырған біздер, ұстаздар қауымы, қазіргі заманның жаңаша талаптары мен үрдістеріне әрқашан сай болуымыз керек.
Зейнехан НАҚЫСБЕКОВА,
Жайсаң орта
мектебінің директоры
Жамбыл ауданы
