Облыстық соттың қылмыстық істер жөніндегі сот алқасының төрағасы Советхан Сәкенов асқаралы алпысқа толды. Осыған орай облыстық соттың мәжіліс залында салтанатты жиын өтті. Онда Советхан Сәкеновтің өмір жолын сипаттайтын «Ар мен заң алдында» атты кітаптың тұсауы кесілді.
Кеш шымылдығы тәжірибелі заңгер, білікті маман Советхан Сәкенұлының ғұмыр өткелінен көрініс беретін бейнебаянмен түрілді. Салтанатты жиынның тізгінін қолға алған облыстық «Жетісу» газеті бас редакторының орынбасары Жұматай Әміреев домбырамен арнау орындап, сахна төріне мерейтой иесін шақырды. Алғашқы құттықтау сөз арнаған облыстық соттың төрағасы Еліс Әбдіқадіров ҚР Парламенті Сенаты Төрағасының орынбасары Бектас Бекназаров пен ҚР Жоғарғы Сотының Төрағасы Жақып Асановтың атынан келген құттықтау хатты оқып, қазақы салтпен шапан жапты. Ал әр жылдары Талдықорған облыстық, Алматы қалалық, Алматы облыстық, ҚР Әскери соттарының және ҚР Судьялар одағының төрағасы қызметін атқарған Серік Байбатыров:
– Советхан алпысқа жақсы келді. Елдің алдында абыройлы қызмет етіп, әділдіктің ақ туын ұстап келген азаматтың бірі. Сондықтан алпыс жасың құтты болсын! Ары қарай жұмыс жасау үшін Құдай күш-қуат берсін. Қазақстан тарихында тұңғыш өткен 1 576 томдық күрделі «Қорғас ісі» сот процесінің үкімін Советхан шығарды. Сол үшін 9 айдан астам уақыт жұмыс істеді. Істі болғандар республикаға белгілі, лауазымды қызметтегі азаматтар еді. Ешкімнің бет-беделіне қарамай өз жұмысына адал бола білді. Еңбек еш кетпейді, бұлайша принциптілікке барып қара қылды қақ жару әркімнің қолынан келе бермейді. Сол еңбегі үшін барлықтарыңыздың алдында рахмет айтамын, – деп Советхан Сәкеновпен қызметтес болып, маңызды істерді қарағанын зор мақтанышпен айтты. Одан әрі облыстық «Жетісу» газетінің бас редакторы Әміре Әрін жүрекжарды ілтипатын білдіре келе тұсауы кесілгелі тұрған кітаптың маңызы мен мазмұнына тоқталды.
– Кітаптың маңызы ерекше. Себебі «Қорғас ісі» бүкіл қазақстандықтардың санасына сіңіп қалған дүние. Сол істі жүргізген Советхан Сәкенов алаштықтардың жүрегіне ұялап қалған, сол істі жүргізу арқылы аңызға айналған судья. Сондай білікті судьяға мыңдаған оқырманның атынан қошемет білдіріп қояйық. Кітап ерекше жазылған. Кітапты оқып отырғанда, біріншіден, сондай бір шытырман оқиғалы детективті, яғни, Қазақстан деген мемлекеттің денесіне шыққан бітеу жараны көресіз. Соның ішкі болмыс-бітіміне, небір қитұрқылық сәттеріне ден қоясыз. Қызықты оқылады. Екінші жағынан, бұл бір үлкен көркем роман, тарихи дүние. Советханның дүниеге шыр етіп келген күнінен бастап өмір жолы жан-жақты баяндалады, – деп кітаптың қазақ қоғамына қаншалықты қажет екенін тілге тиек етіп, сөзін былайша түйіндеді. – Қазақ «Құдай жаққан шырақты шайтан үрлеп өшіре алмайды» дейді. Советханның өмір жолын баяндау арқылы автор өткен ғасырдың сексенінші жылдарында қалыптасқан қазақ жастарының білім алу, қызметке тұру кезеңдерінің ерекшеліктерін дәл көрсетеді. Дәл осы кезде бізге Советхан сияқты осы саланың шын мәніндегі жұлдыздары, қара нарлары керек. «Көз қысты, бармақ бастыға» жол бермейтін қазақтың қайтпас қайсар азаматтары керек. Ол азаматтар мемлекеттің дамуы үшін, қазақтың ертең қазақ болып қалуы үшін керек.
Советхан Сәкеновтің кін-дік қаны тамған айдынды Алакөл ауданы тұрғындарының сәлемін арқалап келген аудан әкімінің орынбасары Алмас Әбдінов аудан әкімі Әлібек Жақанбаевтың құттықтау хатын оқыды. Сонымен қатар, аудандық мәслихаттың шешімімен Советхан Сәкенұлына «Алакөл ауданының Құрметті азаматы» атағы берілгендігін хабарлап, төсбелгісін тақты. Өз кезегінде Ақсу ауданы әкімінің орынбасары Ғазиз Есжанов та мерейтой иесіне аудан әкімі Есім Базархановтың құттықтауын жеткізіп, «Ақсу ауданының Құрметті азаматы» атағымен құттықтады.
Салтанатты жиын әрмен қарай ҚР Жазушылар одағының мүшесі Қуат Қайранбаевтың Советхан Сәкенов жайлы жазылған «Ар мен заң алдында» кітабының тұсаукесерімен жалғасты. Облыстық «Алатау» газетінің бас редакторы Айтақын Бұлғақов, облыстық соттың азаматтық істер жөніндегі сот алқасының төрағасы Досымбет Қалдарбек ыстық ықыластарын білдіріп, жүректен шыққан жылы сөздерін жеткізді. Шара соңында мерейтой иесі, отандық сот жүйесіне елеулі еңбек сіңірген Советхан Сәкенұлы жиналған қауымға алғысын айтып, жүрекжарды лебізін арнады.
– Барлықтарыңызға көп рахмет. Арнайы келген Серік Катенұлына, осы шараны ұйымдастырған Еліс Нұрқасымұлына, Алакөл, Ақсу аудандарының жұртшылығына айтар алғысым шексіз. Кітапты жазған Қуат Қайранбаев мықты журналист, талантты ақын, жазушы. Кітапты 35 томдық айыптау қорытындысы мен 7 томдық үкімнен сығымдап отырып жазды және де соттың, судьяның психологиясын беріп, сот жұмысының ауырлығын, қиыншылығын қаз-қалпында қалың оқырманға ұсынды, – дей келе көпшілікпен естелік суретке түсті.
Мәулен ӘНЕРБАЙ
