Волейболдан еліміздің жеті дүркін жеңімпазы «Жетісу» қыздар клубы жаңа маусымға қызу дайындық үстінде. Алғашқы оқу-жаттығу жиынын Талдықорғанда өткізген волейболшылар қазір Түркияның Белек қаласындағы «Gloria Sports Arena-да» жаттығып жатыр.
Соңғы төрт жыл қатарынан жүлдегер болған (2016, 2018, 2019 – күміс; 2017 – қола) команданың жаңа маусымдағы негізгі мақсаты – чемпион болу. Бұл тұрғыда облыс басшылығы барлық мүмкіндікті жасап отыр. Түрік маманы Бурхан Жанболаттың бапкерлігімен дайындық жүргізіп жатқан команда күзде ел чемпионатын бастайды.
Жаңа бапкердің келуімен команда құрамы да өзгерген. Ұлттық құрама сапында Олимпиада ойындарының іріктеу матчтары мен жағажай волейболынан жаһандық жарыстарға қатысатындарды есепке алмағанда оқу-жаттығу жиынында 13 волейболшы жүр. Оның ішінде клубтың барлық кезеңінен өткен үш бойжеткен – Томирис Сағымбаева, Татьяна Никитина және Юлия Якимова келесі маусымда Ұлттық лигада «Жетісудың» намысын қорғамақ. Сондай-ақ, «Алтайдан» Наталья Акилова, «Алматыдан» келген Ардақ Маратова да командамен бірге дайындық жүргізіп жатыр. Клуб жаңа маусымдағы ойыншыларын тек үшінші оқу-жаттығу жиынынан кейін ғана ресми жариялайды.
Ерлер және қыздар арасындағы Қазақстанның биылғы Суперкубогы қазанда Талдықорғанда өтеді. Биылғы ереже бойынша Суперкубок жеңімпазы Азия клубтық чемпионатында ел намысын қорғайды. Осы тұрғыда командаға сәттілік тілейміз!
Қали АСҚАР
