Ақтөбеде 10-14 шілде аралығында «Baqytty bala» ІІ ашық балалар вокальдық фестиваль конкурсы өтеді. Бұл халықаралық шара әлемнің 9 елінен келген дарынды балаларға вокалдық әлеуетін көрсетуге үлкен мүмкіндік сыйлайды. Ақтөбе қаласының 150 жылдық мерейтойына арналған байқауда қазылар алқасының оң бағасын алған 20 қатысушы қалың көрермен алдында өзара жарысады.
Бізге Ержан Максим мен Наргиз Жанұзақ секілді вокальдық эстраданың жас жұлдыздарын сыйлаған «Baqytty bala» фестивалінің бірінші маусымының тартымдылығы жұртшылықтың назарын аударып қана қойған жоқ, сонымен бірге оқиғаның ауқымын да, шақырылған қонақтардың деңгейін де көрсетті. Бұл іс-шараның мәртебесін арттырғаны сөзсіз.
Алдағы конкурста қазылар алқасының мүшелері болып шетелдік белгілі орындаушылар мен шоу индустриясының құрметті де кәсіпқой мамандары таңдап алынды. Олардың қатарында «X-фактор» жобасына қатысып, бірінші кастингінің бейнетаспасы YouTube хостингінің кеңістігінде вирустық туындыға айналып, қазақстандық көрерменнің де есінде қалған Украинаның танымал әншісі Аида Николайчук бар. Тәуелсіз өкіл ретінде әйгілі «Голос» тележобасының жұлдызы, грузин орындаушысы Нини Цнобиладзе шақырылды. Сондай-ақ сараптамалық командаға Валерий Леонтьев, Николай Басков, Филипп Киркоров және түрік хоры сияқты топ жұлдыздармен жұмыс істейтін Ресейдің өкілі, композитор Евгений Евзеров кірді.
Қазылар алқасының құрамына елімізден Димаш Құдайбергеннің саунд-продюсері және музыка көркемдеуші Ерлан Бекчурин, танымал композитор әрі орындаушы Ұлықпан Жолдас және Димаштың ұстазы, оның бірегей талантын әлемге танытқан, ҚР еңбек сіңірген мәдениет қайраткері Марат Әйтімов шақырылды.
Әлемнің 9 елінен (Украина, Ресей, Белорусь, Польша, Өзбекстан, Қырғызстан, Греция, Канада, Молдова) келген өнерпаздардан 500-ден астам өтінім қабылдаған фестивальдің ақтық сынына іріктеу турында географиялық жағынан өзгерістер пайда болды. Қорытындыға сәйкес, конкурсқа 8 елден келген 20 үміткер жіберілетін болады.
«Baqytty bala» фестивальдің режиссері Анна Обоянская конкурстық өтінімдер сапасының әдеттегіден жақсарғанын және орындаушылардың вокальдық деңгейінің өскендігін айтады. Олардың арасында халықаралық деңгейде өзін көрсетіп үлгерген жеткіншектер де бар екен. Алайда, Аннаның сөзіне қарағанда, іріктеу кезінінің негізгі талаптарына сай қатысушылар ерекше вокальдық және әртістік қабілеттерін көрсетуі тиіс және бұл талап әрдайым сақталып қала бермек. Сондықтан кәсіби орындаушылармен бірге топ-20-ға әлемге әлі танылмаған, бірақ даусы керемет вокальдық әлеуетке ие шалғай өңірлерден келген дарындар да таңдалған.
Анна Обоянскаяның өзіне келсек, ол Украинадан арнайы шақырылған. Оның жинағында Италия, Испания, Түркия және Грецияда өткен халықаралық ауқымдағы жобалар, сондай-ақ «Bastau» атты Димаштың сольдық концерті бар.
Айта кетерлігі, былтыр ақтөбелік 4 бала таңдаулы 20 дарынның қатарына еніп, олардың біреуі 1, 2, 3-дәрежелі, қалған үшеуі Гран при жүлдегері атанған болатын. Бұл, өз кезегінде Ақтөбе әкімдігінің Қазақстан эстрадасының жарқын жұлдыздарын табатын және өсіретін таланттар фабрикасы атағына лайық екендігін дәлелдесе, екіншіден іс-шараны жоғарғы деңгейде және жан-жақты ұйымдастыруға серпін берді. Осындай қолдаудың арқасында, трансфер, тамақтану және қауіпсіздік шараларын қоса алғанда, конкурс қонақтары мен қатысушыларының ыңғайлылығы үшін барлық қажетті жағдайлар көзделген.
«Ақтық концерттің билеттерін сатудан түскен қаражаттың бәрі қалалық мәдениет үйі балалар ұжымының материалдық-техникалық базасын жаңартуға жұмсалады», — деп түсіндірді Ақтөбе әкімінің орынбасары Айгүл Аманқазықызы.
Еске сала кетейік, «Baqytty bala» фестивалі Димаш Құдайбергеннің және оның «ДимашАли» продюсерлік орталығының жетекшілік етуімен ұйымдастырылуда. Әлем тыңдармандарының жұлдызы әрі еркесі қатысушылардың сапасы мен жоғары кәсібилігінің кепілі ретінде конкурстың барлық кезеңіне жеке өзі қатысуда.
Анықтама:
«Baqytty bala» І ашық балалар вокальдық фестиваль-конкурсы 2018 жылы маусымда Ақтөбеде өтті және Ақтөбе облысының мәдени брендіне айналды. «Baqytty bala -2018» конкурсының ұйымдастырушысы «ДимашАли» шығармашылық орталығы болса, облыс әкімдігі қолдау көрсетуде. Елімізде теңдесі жоқ жобаға Қазақстан, Ресей, Өзбекстан, Украина, Греция мемлекеттерінің танымал өкілдері атсалысады. Халықаралық деңгейдегі әртістер фестивальдің қазылар алқасының құрамына кіріп, арнайы қонақтарына айналды: Димаш Құдайберген, Данэлия Төлешова, Джордан Аракелян, Влад Сытник, Жеңіс Ысқақова, Светлана және Қанат Айтбаевтар.
Назым ЖАНҒАЗИНОВА
