Мемлекет басшысының қазақстандықтардың әл-ауқатын арттыру және әлеуметтік жағдайды шешу жөніндегі тапсырмаларын орындау, мектеп оқушыларын оқу әдебиеттерімен қамту, «Дипломмен ауылға» жобасын іске асыру күн тәртібіндегі мәселелердің бірі. Бұл туралы кезекті өткен Үкімет отырысында жан-жақты айтылды.
Алдымен 2019 жылға арналған республикалық бюджетті нақтылау жөніндегі заң жобасы таныстырылды. Онда белгілі болғанындай, биылға арналған республикалық бюджеттің негізгі параметрлері өзгермеген. Президент тапсырмаларын қаржылық қамтамасыз ету тікелей инвестициялар қорын құруға көзделген қаражаттың бір бөлігін қайта бөлу есебінен іске аспақ.
Бюджеттің шығыс бөлігін нақтылау үш бағыт бойынша жүзеге асырылған. Бұдан өзге, 35,9 млрд. теңге көлеміндегі қаражатты қайта бөлу есебінен кейінге қалдыруға болмайтын шешімдерді талап ететін бірқатар міндеттеме қаржыландырылады. Ендігі кезекте әзірленген заң жобасы Парламент қарауына ұсынылмақ.
Келесі кезекте халықтың аз қамтылған тобын, сонымен қатар, жұмыс істейтін жастарды баспанамен қамту шаралары баяндалды. «Нұрлы жер» бағдарламасы аясында көп- балалы отбасылар үшін тұрғын үй сатып алуға және салуға қаржы қарастырылған. Осы ретте республикалық бюджеттен жылына 2 млрд. теңге бөлу жоспарланып отыр. Жыл сайын 6 мың көпбалалы отбасы тұрғын үймен қамтамасыз етілмек. Осы жылдың мамыр айынан бастап мыңнан аса көпбалалы отбасы баспаналы болған. Нұр-Сұлтан, Алматы, Шымкент қалаларындағы жұмыс істейтін жастардың еңбек мобильділігін қамтамасыз ету үшін 2019–2021 жылдары жылына 1 мың жалдамалы пәтердің құрылысы жоспарланыпты.
ҚР Тұрғын үй құрылыс жинақ банкі көпбалалы, толық емес және мүгедек балалары бар отбасыларына тұрғын үй алуға жылдық 2 пайызбен, 10 пайыз алғашқы жарнамен жеңілдетілген несие беруді бастады. Бұл мақсаттарға үш жыл ішінде 150 млрд. теңге бөлу көзделуде. Жыл сайын әлеуметтік көмекпен 6 мың отбасы қамтылатын болады. ҚР Ұлттық банкпен бірге жалдамалы тұрғын үйді дамытуға жеке инвесторлар тарту тетігі әзірленуде. Осының есебінен қосымша 10 мың жалдамалы пәтер салуға мүмкіндік береді және жылына 20 мың отбасы баспанамен қамтамасыз етіледі. 2017–2021 жылдарға арналған «Еңбек» нәтижелі жұмыспен қамтуды және жаппай кәсіпкерлікті дамыту мемлекеттік бағдарламасына өзгерістер мақұлданған. Мақсат – шағын несие мен гранттар беру, қысқамерзімді оқыту және кәсіпкерлік негіздеріне оқыту құралдарын кеңейту.
Жұмыссыздар мен өзін-өзі жұмыспен қамтыған азаматтарды жұмысқа орналастыруға жәрдемдесу шаралары «Еңбек» мемлекеттік бағдарламасы аясында іске аспақ. Жоғары оқу орындарында оқу үшін көпбалалы отбасылар мен атаулы әлеуметтік көмек алатын отбасылардан шыққан балалар үшін қосымша 5 мың мақсатты грант бөлінетін болады. Гранттар трансферттермен жергілікті атқарушы органдарға беріледі. Республикалық маңызы бар облыс, қала және Елорда әкімдері конкурстық комиссия құрады. Оған қатысудың міндетті шарты – ҰБТ-ның шекті баллын жинау.
Қосымша гранттар бойынша конкурсқа өтініштер қабылдау 5 және 10 тамыз аралығында жүргізіледі. Гранттар 25 тамызға дейін тағайындалатын болады. Грант иегерлерінің тізімі жергілікті БАҚ арқылы жарияланбақ. Барлық грант иегерлеріне 20 949 теңге көлемінде шәкіртақы тағайындалады. Ал «Мектепке жол» қайырымдылық акциясы 1 шілдеден басталды.
Айгүл БАЙБОСЫНОВА
