Жастарға қызмет көрсету орталығында «Жастар көзқарасы: парасаттылық пен адалдық» тақырыбында облыстық форум өтті.
Форумға ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің облыс бойынша департамент басшысы Серікбай Нұрғисаев, Сыбайлас жемқорлыққа қарсы іс-қимыл Ұлттық бюросының облыс бойынша департамент басшысы Данияр Тұрғамбаев және ҚР Президенті жанындағы Мемлекеттік басқару академиясының облыс бойынша филиалының директоры Қазыбек Шакишев қатысты. Сондай-ақ, облыс, қала, ауылдық жерлерде мемлекеттік қызметте жүрген мамандар келді.
Форум сыбайлас жемқорлыққа қарсы күрес, жастарға жағдай жасау шаралары аясында өрбіді. Сөз кезегін алған облыстық жастар саясаты мәселелері басқармасының басшысы Жомарт Қаратас: «Биылғы жылдың «Жастар жылы» деп аталуының өзі бізге артылған үлкен сенімді білдіреді. Қазақстан – өз орнын әлемдік аренада қалыптастырып үлгерген мемлекет. Ал, ол Елбасы Нұрсұлтан Назарбаевтың сарабдал саясатының арқасында іске асты. Осы алаңға жиналуымыздың басты себебі, сенімді ақтау және жастар арасындағы мәселелерді талқылап, шешу жолын бірге қарастырайық деген ниет. Сонымен қатар, ашық алаңда әркімнің өз ойын еркін білдіруге мүмкіндік туғызу», – деді.
Пленарлық отырыстың қонағы Серікбай Өрікбайұлы сөз алып, жастарға бүгінде мемлекет тарапынан көрсетіліп жатқан көмектің күн санап артып келе жатқанын алға тартты.
Форумның екінші кезеңі секциялық жұмыстарға ұласты.
Аймарал ДӘУЛЕТБЕКҚЫЗЫ
