Қапшағай қалалық әкімдігінде «7-20-25» бағдарламасындағы жаңа мүмкіндіктер мен өзгерістерді түсіндіру жұмыстары бойынша жиын өтті. Оған облыс әкімінің орынбасары Жеңіс ТҰЯҚОВ қатысты.
Аталған бағдарлама бойынша биыл шағын шаһарда 640 пәтерлі ғимарат бой көтереді. Яғни, жоба аясында үй алғысы келетін тұрғындар саны күн санап көбейіп жатыр. Басқосуда бағдарламаның жеңілдіктері де сөз болды. Мәселен, Үкімет тарапынан бюджеттік мекеме қызметкері мен көпбалалы отбасыларға 1 миллион теңге қайтарымсыз көмек беріледі.
Өзгерістерге келсек, осыған дейін өтініш бергенде туған-туысы кепіл болса, енді бұл міндетті кез келген Қазақстан азаматы атқара алады. Бүгінде Қапшағай қаласы бойынша берілген өтініштердің 105-ін банк қызметі қарап, оның 85-іне рұқсат берген. Ал солардың ішінде екеуі бүгінде үй алды.
Жиынға келген алты банктің өкілі тұрғындарға несие жүйесін түсіндіріп, қандай жағдайда бағдарлама бойынша үй алатындықтарын тарқатып айтып берді. Тағы бір өзгеріс, ол – банк талабындағы тұрғындардың жас мөлшерінің ұзаруы.
Жиын соңында Жеңіс Шылбынұлы инженерлік жүйені реттеуді жергілікті әкімдікке тапсырды. Дәл осындай жиындар енді аймағымыздың барлық жерінде өтпек.
Серік ҚАНТАЙ
Қапшағай қаласы
