Зейнетақының ең төменгі мөлшері 2019 жылдың 1 қаңтарынан 36108 теңге мөлшерінде (2018 жылдың 1 қаңтарынан 33745 теңге болған), ең төменгі базалық зейнетақы мөлшері 15274 теңгеден 16037 теңгеге дейін өсірілді. Яғни, 2019 жылдан жасына байланысты зейнетақының ең төменгі мөлшері базалық зейнетақыны қосып есептегенде 52145 теңгені кұрады (2018 жылы 49018 теңге болған).
2019 жылдың 1 қаңтарынан жасына байланысты және еңбек сіңіргені үшін зейнетақы мөлшерлері алып жүрген зейнетақы мөлшерінен 7 пайызға көбейтілді. Ең төменгі күнкөріс деңгейі 29698 теңге болып және ең төмен жалақы 42500 теңге болып белгіленді.
Қазақстан Республикасының 2013 жылдың 21 маусымындағы «Қазақстан Республикасында зейнетақымен қамсыздандыру туралы» Заңында 2019 жылдың 1 қаңтарынан тағайындалатын зейнетақы мөлшерін есептеу үшін қолданылатын орта айлық табысы 46 айлық есептік көрсеткішпен шектеледі.
2018 жылғы 30 қарашадағы № 197-VI Қазақстан Республикасының «2019-2021 жылдарға арналған республикалық бюджет туралы» Заңына сәйкес, 2018 жылға айлық есептік көрсеткіш 2525 теңге мөлшерінде белгіленгендіктен, 2019 жылдың 1 қаңтарынан жасына байланысты зейнетақы тағайындалатын азаматтарға зейнетақы мөлшерін есептеуге алынатын табыс 116150 теңгемен (2525,00 х 46) шектелетін болады.
Сонымен қатар, Қазақстан Республикасының «2019 – 2021 жылдарға арналған республикалық бюджет туралы» Заңына сәйкес, 2018 жылға арналған айлық есептік көрсеткіштің 2525 теңгеге дейін көбейтіліп белгіленуіне байланысты арнайы мемлекеттік жәрдемақының, № 1 және № 2 Тізімдер бойынша мемлекеттік арнайы жәрдемақылардың, бала туғанда бір рет төленетін және бала бір жасқа толғанға дейін күтімі үшін жәрдемақының, Семей ядролық сынақ полигонында зардап шеккен азаматтарға бір рет төленетін өтемақының, жаппай саяси зардап шеккен азаматтарға төленетін өтемақының мөлшерлері де өсті.
1997 жылғы 16 маусымдағы № 126 Қазақстан Республикасында мүгедектігі бойынша, асыраушысынан айырылу жағдайы бойынша және жасына байланысты берілетін мемлекеттік әлеуметтік жәрдемақылар туралы» Заңның 12, 16 баптарына сәйкес мүгедектігі бойынша, асыраушысынан айырылу жағдайы бойынша мемлекеттік әлеуметтік жәрдемақылардың мөлшері ең төменгі күнкөріс деңгейінің көтерілуіне байланысты өсірілді. 2019 жылдың 1 қаңтарынан I топтағы жалпы ауруы бойынша мүгедектің жәрдемақы мөлшері 57021 теңгені, (2018 жылдың 1 қаңтарынан – 54306 теңгені, II топтағы жалпы ауруы бойынша мүгедектің жәрдемақы мөлшері 45438 теңгені, (2018 жылдың 1 қаңтарынан – 43275 теңгені құраған), III топтағы жалпы ауруы бойынша мүгедектің жәрдемақы мөлшері 30886 теңгені құрады (2018 жылдың 1 қаңтарынан – 29416 теңгені құраған).
Мүгедек баланы (18 жасқа дейін) тәрбиелейтін ата-анаға (қорғаншысына, қамқоршысына) төленетін жәрдемақының мөлшері және бала жасынан бірінші топтағы мүгедекті күтім жасаудағы адамдарға ең төменгі күнкөріс деңгейі өсірілді, яғни, 2019 жылдың 1 қаңтарынан осы жәрдемақының мөлшері 31183 теңгені құрады.
Мемлекеттік әлеуметтік сақтандыру қорынан еңбек ету қабілетінен, асыраушысынан айырылған жағдайларда 2019 жылдың 1 қаңтарына дейін тағайындалған әлеуметтік төлемдердің мөлшері 5 пайызға өсірілді.
2019 жылдың 1 қаңтарынан барлық әлеуметтік төлем алушылардың зейнетақы және жәрдемақы мөлшерлері өсіріліп, «Азаматтарға арналған үкімет «Мемлекеттік корпорациясы» коммерциялық емес акционерлік қоғамының Алматы облысы бойынша филиалының аудандық, қалалық әлеуметтік қамсыздандыру бөлімшелері арқылы төленуде.
Ж. ДӘЛІБАЕВ,
Еңбек, әлеуметтік қорғау және көші-қон комитетінің облыс бойынша департамент
басшысының орынбасары
