Air Astana әуе компаниясы Airbus A321LR ұшақтарын жоғары жылдамдықты спутниктік Wi-Fi жүйесімен жабдықтау жұмыстарын бастады, – деп хабарлайды 7-su.kz ақпараттық порталы.
Жолаушыларға арналған бұл инновациялық қызмет халықаралық SES компаниясымен бірлесіп жүзеге асырылуда. Инженерлік және монтаждау жұмыстарын отандық әуе компаниясының өз техникалық базасындағы білікті мамандары сапалы атқарып шықты. Заманауи интернет қызметі қолжетімді болған алғашқы әуе кемесі – EI-KGB тіркеу нөмірлі Airbus A321LR ұшағы. Жоғары жылдамдықты спутниктік байланысы бар алғашқы рейс 2026 жылғы 29 қазанда Алматы – Ташкент бағыты бойынша сәтті орындалды.
Цифрлық инфрақұрылымды дамытуға бағытталған бұл жоба Қазақстан Республикасы Жасанды интеллект және цифрлық даму министрлігі мен Қазақстан Республикасы Көлік министрлігінің тікелей қолдауымен орындалуда. Әуе тасымалы сапасын арттыратын қызмет аясында жолаушыларға арнайы жеңілдіктер қарастырылған. Алдағы 2027 жылғы 31 қаңтарға дейін жалғасатын промоакция кезеңінде ұшақ бортындағы барлық жолаушы интернетке тегін қосылу мүмкіндігіне ие.
Ал 2027 жылғы 1 ақпаннан бастап бизнес-класс жолаушылары мен Nomad Club бағдарламасының Gold және Diamond мәртебесі бар мүшелері үшін Wi-Fi қызметі тұрақты түрде тегін ұсынылады. Сонымен қатар Nomad Club бағдарламасына тіркелген барлық жолаушылар мессенджерлерді тегін қолдана арайды, ал қалған саяхатшылар үшін арнайы ақылы интернет-пакеттер сатылымға шығарылады. Барлық Airbus A321LR ұшақтарын спутниктік желімен жабдықтау жұмыстары 2027 жыл бойы кезең-кезеңімен толық аяқталады.
Бұл жоба еліміздің азаматтық авиация саласындағы цифрлық дамуын жаңа деңгейге көтереді. Әуедегі жоғары жылдамдықты байланыс сапар барысында жұмыс істеуге, жақындармен хабарласуға және сапалы контент тұтынуға зор мүмкіндік береді. Осындай заманауи шешімдер жолаушылардың жайлылығын арттырып, Қазақстанның әуе тасымалы нарығындағы бәсекеге қабілеттілігін нығайтады.
