Алтын түстес алқаптағы жиын-терін жұмыстары күннен- күнге қарқынды жүргізіліп, дала төсінде берекелі істің көрігі қызып жатыр.
Биыл Талғар ауданы бойынша егіс алқабы 33895 гектарды құрады. Оның 13725 гектары дәнді дақылдар болса, 3744 гектары күздік, 9425 гектары жаздық дақылдар. Бұдан өзге 4860 гектарға майлы дақылдар, 3785 гектарға картоп, 2721 гектарға көкөніс пен 220 гектарға бақша дақылдары өсірілген. Ал 8584 гектар жердегі жем-азықтық дақылдар да бітік шыққан.
Жазғы күтіп-баптау шараларын мерзімінде жүргізіп отыру – мол өнім алудың кепілі. Бұған дала еңбеккерлері айрықша ден қояды. Егістікке органикалық тыңайтқыштардың уақытылы себілуі де өзіндік септігін тигізеді. Бұл орайда, «КазФосфат», «КазАзот», «КазАгроХолдинг», басқа да жауапкершілігі шектеулі серіктестіктермен келісім-шарт жасасып, осы мақсатта 1500 келі тыңайтқыш, 1896 литр өсімдіктерді зиянкестерден қорғау мақсатында ауылшаруашылығы дақылдарын өңдеуге арналған гербицид қолданылды. Бүгінгі күнге шөп шабудың бірінші кезеңі аяқталып, 6334 гектардан өнімділігі 32,4 центнерді құрайтын 20522 тонна өнім алынды. Осы күні күздік дәнді дақылдар мен жаздық арпа жинау жұмысы қызу жүріп жатыр, – дейді аудандық ауылшаруашылығы бөлімінің басшысы Ермек Толқынов.
Науқан жұмыстары аталған аудандағы ең ірі шаруа қожалықтарының көшбасшысына айналған «Байсерке-Агро», «ЛаФаттория», «Амиран» жауапкершілігі шектеулі серіктестіктерінде қарқынды жүріп жатыр. Егіс алқаптарында 15 комбайн, 7 жүк көлігі және 40-тан астам адам еселі еңбек етуде. Ширақ іс-қимылдың арқасында қамбаға 120 мың тонна күздік арпа, 570 тонна жемдік бидай және 50 тоннадан артық сұлы түсті.
Ұлбосын ИСАБЕК.
