Еліміздегі бейбітшілік пен тыныштық, тұрақтылық пен қарқынды даму әлемнің көптеген еліне үлгі болып отырғаны бүгінгі күннің шындығы. Ең алдымен халықтың қалаған ісімен айналысып, тіршілігін жандандыруға жасалып отырған мүмкіндік кейбір мемлекеттер үшін арманға айналуда. Оның дәлелін көптеп келтіруге болады. Бір ғана әлемдік картада «Таяу Шығыс» деп аталатын өңірге көз салсақ көптеген елдің соңғы 10 жылдың ішінде соғыстан көз ашпағанын көреміз.
Сондықтан өзгелерді мысалға алу арқылы еліміздің келешегі бүгінгі жастарға соғыс зардабының қандай болатынын ұқтыруымыз керек. Әйтпесе, анау айтты, мынау бүйтті деген желеумен астыртын әрекет жасаушылардың жетегіне еріп кететін жасөспірімдер қатары азаймай тұр. Жастар жаңа отырғызылған көшет секілді. Оның түзу де биік, жуан да берік болып өсуі берілген тәрбие мен тәлімге тікелей байланысты. Егер қисық әрі теріс тәрбие көрсе көзге сұрықсыз, іске жарамайтын шыбық шығады. Ондай ағаш құрылыс материалы болып жарытпайды. Мұны бейнелі түрде айтып отырмыз. Ағаш та адам баласы секілді. Бұтағы ұрпағы тәрізді. Жапырағы жылдары мен күндері сияқты. Өседі, өледі, жеміс береді, қажетке жарайды.
Адамның да басты мақсаты қоршаған ортаға, мемлекетке, ел мен жерге пайдалы болу, тәрбиелі ұрпақ өсіру. Мағыналы өмір сүріп, ағайын-туысқа, көрші-қолаңға жәрдем жасау. Осындай асыл құндылықтар жүктелген адам баласы кейде адасып, теріс жолға түсіп жататыны да рас. Алайда ондайды түзеу, дұрыс жолға салу ауыл ақсақалдарына, ер-азаматтарына жүктеледі. «Адасқанның айыбы жоқ, қайта үйірін тапқан соң», «Өз балаң өзектен тепсең де кетпейді» деген даналық сөзбен көптеген мәселенің басын ашып, түйінін тарқатқан ата-бабаларымыз қандай көреген десеңізші?! Араздасқанды татуластырып, шамданғанды жарастырған тәлім-тәрбиенің тамыры тереңде жатыр. Ғасырлар қойнауынан бүгінге жеткен ұлттық тәрбиенің өзегі осындай асыл құндылықтарға негізделгені баршаға аян.
Ел болған соң телісі мен тентегі де болатыны анық. Сондықтан да болар, ел іргесінің берік, шаңырағының биік болғанын көре алмайтын әрекеттер ара-тұра болса да көрініп қалады. Әсіресе, бүгінгідей ғылыми-технология дамыған кезеңде бүкіләлемдік интернеттегі әлеуметтік желілер арқылы оң мен солын танымай, солқылдақтық танытып жүрген жандарға теріс үгіттеп, мемлекеттің бүтіндігін ішінен бұзғысы келетін қадамдар анық байқалады. Жамандықтың түп-тамыры бір. Сондықтан лаңкестік, экстремизм, терроризм сынды жағымсыз істердің айырмасы жоқ. Ол үшін қару алып, бүлік шығаруды көздейтіндер мен халықты алаңға шығып, түрлі талап қоюға шақыратындар бірдей. Сол себепті, қара ту алып, Тигр мен Эфрат өзендерінің аймағындағы Сирияда халифат құрмақ болған лаңкестер мен шет мемлекетте жатып, Қазақстан азаматтарын азғырған Әбілязов әрекетінің айырмасы шамалы дер едім. Олардың бәрі де еліміздің тыныштығын, тұрақтылығын, бейбітшілігін, ырыс-құт, бақ-берекесін көп көреді. Ұрпағымыздың білімді, тәрбиелі, ұлттық құндылықтармен сусындап өскенін қаламайды. Бір сөзбен айтқанда, Қазақстан атты байтақ елдің тынышын кетіріп, сәбилердің күлкісін тиюға мүдделі. Болашақтың күні ашық, жұлдызы жарық болуы шынайы күлкіде екендігін ескерсек, лаңкестердің пиғылы еліміздің келешегін көре алмауда жатқандығын байқау қиын емес.
Ғасырлар бойы ұрпақ тәрбиесін өзіндік ұстанымымен, өзіндік бағытымен жүргізген халқымыз елдің тынышын алған бүлікшіні аяусыз жазалап, әрбір рудың беделді ақсақалының тезіне салдырып отырған. Соның әсерінен болар ұшқан құстың қанаты талар, шапқан аттың тұяғы тозар ұлан-байтақ далаға түрме атаулы салынбады. Жазықтыға айыппұл ретінде көп жылқы салық салынды. Ол төлей алмаса руынан алынды. Есесіне басбұзар немесе бүлікші өз руының белді де бай адамына өмір бойына жалшы болды. Сол арқылы телі мен тентегін әрбір тайпа өзі түзетті. Оны көрген жастар жамандықтан қашық жүріп, жақсылыққа жақын болудың дұрыстығын білді. «У ішсең руыңмен» деген сөздің мәнісі осында жатыр.
Ендеше, ұлттық тәрбиенің негізгі тетіктерін іске қосып, адасқандардың жетегінде кеткен жастарымызды осылайша тәрбиелеуіміз керек. Өйткені, ұрпақ тәрбиесі бейжай қарайтын нәрсе емес. Әлемдік өркениеттің қаңсығын таңсық көрген жастарымыздың бітім-болмысын, кескін-келбетін ұлттық тәрбие арқылы сақтай аламыз. Әйтпесе, бәрі керісінше болады.
Облыстық ішкі саясат басқармасы
