ҚР Премьер-Министрі Бақытжан Сағынтаев өткізген кезекті селекторлық жиында келелі мәселелер қаралып, «Нұрлы жол» мемлекеттік бағдарламасының іске асырылу барысы баяндалды. Алматы агломерациясын 2030 жылға дейін дамытудың ұзақмерзімді жоспары жайында айтылып, агроөнеркәсіптік кешенді дамытудың мемлекеттік бағдарламасын өзектендіру мәселелері талқыланды.
Алғашқы мәселе Жамбыл облысындағы жолаушылар пойызының теміржолдан шығып кету себебін анықтап, апаттың салдарын жою мақсатында атқарылар істі үйлестіретін штаб жұмысынан басталды. Алғашқы сөз алып, бейнеконференция арқылы байланысқа шыққан «Қазақстан теміржолы» ҰК президенті Қанат Алпысбаев штаб жұмысын тілге тиек етті. Ол өз сөзінде осыған дейін болған апаттарға ұқсамайтын техникалық көрсеткіштердің болғанын көрсетіп, пойыз жолын модельдеу бойынша ғылыми-техникалық зерттеулер жүргізетін арнайы мамандардың тартылғанын айтып өтті. Сондай-ақ, бүгінде жол учаскесі инфрақұрылымының техникалық жағдайы тексерілуде екені тілге тиек етіліп, тиісті шаралардың қабылданып жатқаны жеткізілді. Айта кетерлігі, ендігі кезекте теміржолдың барлық учаскелерінде пойыз қозғалысының қауіпсіздігі қатаң бақылауға алынып, маусым айының соңында тексеру жұмыстары түйінделмек. Бақытжан Әбдірұлы апаттан қаза тапқан жолаушының отбасына жәрдем беруді Қарағанды облысының әкімдігіне жүктеп, тиісті көмектер көрсетуді тапсырды.
Күн тәртібіндегі мәселенің тағы бірі «Нұрлы жер» бағдарламасының іске асырылу барысы бойынша Инвестициялар және даму вице-минстрі Роман Скляр баяндады. Оның айтуынша, мемлекеттік жоспарлау жүйесіне сәйкес «Нұрлы жер» бағдарламасы мемлекеттік статусына қайта бекітілмек. Сондай-ақ, құрылыстың көлемін арттыру бойынша құрылыс алаңдарын инженерлік желілермен қамтамасыз ету мөлшері 20 млрд. теңгеге артпақ. Бағдарламадағы өзгерістер бойынша жеке құрылыс салушылардың бағдарламадағы белсенділігі үшін әкімдіктер салынған нысандарды сатып алуға құқылы. Несиелік үйлер Тұрғын үй құрылыс жинақ банкінің салымшыларымен қатар екінші деңгейлі банк салымшыларына да өткізілмек. Вице-министрдің сөзіне сүйенсек бұл «7-20-25» ипотекалық бағдарламасының дамуына тікелей әсер етеді екен. Ағымдағы жылы кем дегенде 12.1 млн. шаршы метр тұрғын үй пайдалануға берілмек. Ол үшін республикалық бюджеттен 148. 6 млрд. теңге қарастырылған. Аталмыш мәселе барысында ел өңіріндегі үй құрылысының жай-күйі айтылып, Қызылорда, Павлодар, Батыс Қазақстан облыстарының әкімдері мен Астана және Алматы қалаларының басшылары баяндама жасады.
Күн тәртібіндегі келесі мәселе бойынша сөз алған Ауылшаруашылығы бірінші вице-министрі Арман Евниев агроөнеркәсіп барысындағы бағдарламаларға тоқталып өтті. Етті және сүтті мал шаруашылығын, құс шаруашылығын, суармалы жерлер мен қант өндіру саласын дамыту бойынша ұзақмерзімді жоспар әзірленген. Кемінде 10 жылды қамтып әзірленген жоспарда 80 мыңнан астам отбасылық фермаларды құру, жайылымдарды 58 млн. гектардан 100 млн. гектарға жеткізу, ірі қара малын 15 млн.-ға, қой санын 30 млн.-ға жеткізу көзделген. Арман Қайратұлы биыл тұқым шаруашылығын субсидиялаудың жаңа тетігі енгізілетінін айтып, фермерлерге субсидия алу үшін көп құжат жинаудың қажеті жоқтығын жеткізді.
Өз кезегінде сөз алған Ұлттық экономика министрі Тимур Сүлейменов агроөнеркәсіп кешенін дамытудың мемлекеттік бағдарламасына түзету енгізу керектігін тілге тиек етіп, сол арқылы 4 теңге жеке инвестицияға шаққанда 1 теңге тарту мүмкіндігі туатынын айтты. Сондай-ақ, асыл тұқымды аналық мал басын әкелу арқылы мал тұқымын одан әрі жетілдіру мен мал шаруашылығындағы жалпы өнімнің 200 млрд. теңгеге артуына жол ашылмақ. Тақырып төңірегінде «ҚазАгро» ҰБХ басқарма төрағасы Нұрлыбек Мәлелов, «Атамекен» ҰКП төрағасы Абылай Мырзахметовтың баяндамалары тыңдалып, суарылатын жерлер жайында Азия даму банкінің Қазақстандағы өкілдігінің директоры Джованни Капанеллидің ойы ортаға салынды. Алматы агломерациясын дамыту бойынша 2020 жылға дейінгі өңіраралық жоспар бекітіліп, негізгі үш міндет бойынша 67 іс-шара өткізу көзделген. Аталмыш жоспардың іске асу барысын баяндаған ҚР Экономика министрі Тимур Сүлейменовтің мәліметі бойынша агломерация аумағы 9.4 мың шаршы шақырымды құрайды. Алматы қаласының тартылыс аймағына экономикалық, еңбек және әлеуметтік тұрғыдан тығыз байланысты Талғар, Есік, Қаскелең, Қапшағай қалалары мен Еңбекшіқазақ, Жамбыл, Іле, Қарасай және Талғар аудандарының елді мекендері кіреді. Осы орайда атқарылып жатқан ауқымды істер қатары да жетерлік.
Өз кезегінде сөз алған Алматы қаласының әкімі Бауыржан Бәйбек ағымдағы жылдың аяғына дейін жекеменшік сектордың газбен толық қамтамасыз етілетінін жеткізді. Сонымен қатар, атқарылған жұмыстар тізбегінде мультимодельді негізде қаланың қоғамдық көлігін дамыту, Алматы, Алматы облысының 2015-25 жылдарға арналған денсаулық сақтау, білім беру ұйымдарының перспективалы жоспары, жеңіл рельсті көлік желісін салу мәселелері бар. Тақырып төңірегінде сөз алған Алматы облысы әкімінің бірінші орынбасары Лаззат Тұрлашов тұрғын үй құрылысы мемлекеттік қолдаудың барлық шараларымен қамтамасыз етілетінін атап өтті. Сондай-ақ, жер телімдері бөлініп, инженерлік инфрақұрылымдар жүргізіліп, Үлкен Алматы айналма автокөлік жолының құрылысы кезінде қосымша жұмыс орындарының ашылатынын айтып өтті. Аталмыш жоба іске қосылса ел экономикасы жаңаша серпін алмақ.
Жиын қорытындысында ҚР Премьер-Министрі Бақытжан Сағынтаев Ұлттық экономика министрлігіне мүдделі мемлекеттік органдармен, әкімдіктермен бірлесіп Алматы агломерациясын дамыту бойынша қарқынды қызмет атқаруды тапсырды.
Құралбек СӘБИТОВ.
