Бейсен Құранбек атындағы Журналистер үйінде өткен брифингте Кербұлақ ауданының әкімі Жанат Жүнісбеков өңірдің 2026 жылғы тоғыз айдағы әлеуметтік-экономикалық даму қорытындыларын баяндады. Ауыл шаруашылығы, өнеркәсіп, инвестиция тарту, тұрғын үй құрылысы және инфрақұрылымды дамыту бағыттарындағы негізгі көрсеткіштерге тоқталды.
Есепті кезеңде ауыл шаруашылығы өнімінің көлемі 35,2 млрд теңгені, өнеркәсіп өндірісі 44 млрд теңгені құрады. Негізгі капиталға 34,6 млрд теңге инвестиция тартылды. Ал шағын және орта кәсіпкерлік субъектілерінің саны 3454-ке жетіп, бұл салада 5,2 мыңнан астам адам жұмыспен қамтылған. Кәсіпкерлер өндірген өнім көлемі 9,5 млрд теңгені құрады.
Аудан экономикасының негізгі бағыттарының бірі – ауыл шаруашылығы. Биыл егіс алқаптарының көлемі 113,9 мың гектарды құрады. Қазіргі уақытта дәнді дақылдардың 99,1 пайызы жиналып, 211,7 мың тонна өнім алынған. Қант қызылшасының орташа өнімділігі гектарына 500 центнерге жетіп, өткен жылғы көрсеткіштен артты.
Су үнемдеу технологиялары 2856 гектар алқапқа енгізілген. Сонымен қатар ұзындығы 105 шақырым суару арналарын қайта жаңғырту жобасы әзірленуде. Жоба құны 17 млрд теңге. Оны 2026-2028 жылдары іске асыру нәтижесінде 7 мың гектар жаңа суармалы жер айналымға қосылады.
Инвестиция тарту бағытында да бірқатар жоба жүзеге асырылуда. Жыл соңына дейін инвестиция көлемін 60 млрд теңгеге жеткізу жоспарланған. Алдағы жылдарға арналған инвестициялық пулға жалпы құны 1,4 трлн теңгені құрайтын алты жоба енгізілген. Олардың қатарында Көксу өзеніндегі су электр станциясының құрылысы, тау-кен байыту комбинатын, күн электр станциясын және кен өңдеу кәсіпорындарын салу бар. Жобалар іске асқанда 2,5 мыңға жуық жаңа жұмыс орны ашылады.
Тұрғын үймен қамту мәселесі де назардан тыс қалған жоқ. Сарыөзек ауылында 60 пәтерлі тұрғын үй пайдалануға берілді. Әлеуметтік осал топтағы отбасыларға арналған тағы 157 үйдің құрылысы жүргізіліп, оның 115-і сатып алынған.
Аудандағы 63 елді мекеннің 59-ы орталықтандырылған ауыз сумен қамтылған. Биыл Сарыөзек, Ақбастау және Тастыөзек ауылдарындағы су жүйелерін қайта жаңғырту жұмыстары аяқталды. Газдандыру бойынша 21 елді мекенге табиғи газ жеткізілген. 2030 жылға дейін тағы 32 ауылды көгілдір отынмен қамту жоспарланып отыр.
Жол инфрақұрылымын дамыту аясында биыл үш елді мекенде 10,4 шақырым көше жолы жөнделді. Нәтижесінде ауданның ішкі жолдарының қанағаттанарлық жағдайдағы үлесі 74,7 пайызға жетті.
Әлеуметтік салада тоғыз айда 1469 жаңа жұмыс орны ашылды. Білім беру ұйымдарында жөндеу жұмыстары жүргізіліп, алты мектеп заманауи пәндік кабинеттермен жабдықталды. Ал ауылдық денсаулық сақтауды жаңғырту аясында соңғы үш жылда 17 медициналық нысан салынды.
Брифинг соңында аудан әкімі өңірдің әлеуметтік-экономикалық әлеуетін арттыру, инвестициялық жобаларды жүзеге асыру және ауыл тұрғындарының өмір сүру сапасын жақсарту бағытындағы жұмыстар жалғасатынын атап өтті.
Аяулым Шынгаева
