Текелінің туристік әлеуетін арттыру үшін 11 жоба әзірленген. Олар жоспар бойынша кезең-кезеңімен жүзеге асырылуда. Бұл туралы кенді шаһарда өткен алғашқы инвестициялық форумда айтылды. Сонымен бірге қаланың әлеуметтік-экономикалық дамуы жайында сөз болып, оның жылдам әрі әртарапты дамуы әңгіме арқауына айналды.
Шараға облыстық өңірлік дамыту орталығы, «Атамекен» ұлттық кәсіпкерлер палатасының облыстық филиалы, Текелі қаласы әкімдігінің өкілдері мен кәсіпкерлер қатысты.
Кездесуді қала әкімі Бақтияр Өнербаев жүргізіп отырды. Ол әуелі бұл форумның қала тарихында тұңғыш рет өткізіліп отырғанын айта келіп, іскер топ өкілдері ұсынатын инвестициялық жобаларды іске асыруға Текелі қаласының аумағында барлық жағынан қолдау көрсетілетінін атап өтті.
– Форум аясында өткен кездесулер болашақтағы өзара тиімді және жан-жақты ынтымақтастықты дамытуға, қала экономикасының барлық саласында инвестициялық әлеуетті тиімді қолдануға мүмкіндік береді, – деді Бақтияр Әлтайұлы.
Бұдан соң қала басшысы қонақтарға кенді шаһардың инвестициялық тартымдылығын әңгімелеп берді. Оның айтуынша, қазірде аймақта пайдалы қазба байлығы мен инфрақұрлымдық тиімділігін айтпағанда, ауылшаруашылығы, туризм, құрылыс, өнеркәсіп өндірісі, жаңартылған энергия көздері сынды бизнестің перспективті бағыттарында оң өзгеріс байқалып отыр.
Соның ішінде аймақ экономикасының негізгі күші ретінде өнеркәсіп саласы танылған. Мәселен, бұл салаға жыл басынан бері 1,6 млрд. теңге көлемінде инвестиция тартылды. Соның бір көрінісі, бүгінде қалада шойын өңдейтін зауыт іске қосылған. Кәсіпорын шілдеде алғашқы өнімін шығармақ.
Шаһар экономикасын өркендетер жоба бұл ғана емес. Биыл қалада озық үлгіде атшаптырым аумаққа жылыжай салынбақ. Жобаға жауапты «Алма отаны» ҚЖК бас директоры Сәтбек Кеншімнің айтуынша, кешеннің жалпы аумағы 10 гектарды қамтиды. Соның нәтижесінде жылыжайда 250-ден аса адам еңбекпен қамтылады деп жоспарланған.
– Біздің таныстырған жобамыз – голландиялық жылыжай салу. Қазір бәрі дайын. Бүгін келісімшартқа келіп жұмысты бастаймыз. Бұл жерде жалпы жоспар бойынша жылына 14 000 тонна өнім шығаруды көздеп отырмыз. Бастапқыда қияр, қызанақ өнімдері болады. Кейін шаруашылықты одан әрі ұлғайту да ойымызда бар, – деді Сәтбек Кеншім.
Ұлғайту демекші, кенді шаһарда туристік саланы кеңінен дамытуға да мүмкіндік көп. Соның бірі – биыл қалада ең алдымен экотуризмді өркендетуге көңіл бөлінген. Жоба бойынша балалар мен жасөспірімдердің туристік өлкетану орталығы мен демалыс аймақтары ашылады. Сонымен қатар, алты қонақүй кешені салынбақ.
Осылайша бірқатар жобаның іске асуына мұрындық болған бизнес форумда қала әкімдігі мен инвесторлар өзара меморандумдарға қол қойды. Өз кезегінде Текелі қаласының әкімі Бақтияр Өнербаев қонақтарға алғысын жеткізіп, аймақ әлеуеті үшін алда бірлесіп атқарар жұмыстардың баянды болуына тілектестігін білдірді.
Қозыбай ҚҰРМАН.
