Әркім өз саласы бойынша еңбек еткенде ғана табысқа жетпек. Ауыл мен аудандық жерлерде өз мамандығының қызығы мен қиыншылығын көріп, маңдай терін төгіп жатқандар саусақпен санарлық. Бұл – тікелей өңір спортының дамуына қарата айтылған сөз.
Облыс әкімінің орынбасары Жақсылық Омардың төрағалығымен өткен жиында осы айтылған әңгіме өзекті тақырыпқа айналды. Қазіргі таңда әдіскерлердің бұқаралық спортты дамытудағы негізгі міндеттерін орындау сапасы жеткілікті деңгейде емес. Жиында айтылғандай, облысымызда қазіргі кезде 253 спорт әдіскері бар. Оның 65 пайызы бұрын спорт саласында жұмыс істемеген.
2014-2018 жылдары әдіскерлер тарапынан 12 мың спорттық-бұқаралық шара өткізіліп, оған 540 мыңға жуық адам қатысқан көрінеді. Жақсылық Мұқашұлы аталған көрсеткішті өте төмен деп бағалап, кейбір нұсқаушылардың 4 жыл ішінде небәрі 25 спорттық бұқаралық шара өткізгенін сынға алды. Сонымен қатар, облыстық дене шынықтыру және спорт басқармасы басшысының, аудан, қала әкімдері орынбасарларының есебін тыңдағаннан кейін спорт нұсқаушыларының қызметін бағалаудың рейтингілік жүйесін енгізуді тапсырды.
– Спорт әдіскерлері бұқаралық спортты дамытумен айналысуы керек. Бұл – олардың басты міндеті. Ұлттық спортты мерекелік күндері халық өзі-ақ өткізіп алады. Қазақ барда ұлттық спорт өлмейді. Ал әдіскерлер болса олимпиадалық спорт түрлерінен жарыстар өткізіп, өрендерді тарту қажет. Сонда ғана Көк байрағымыз әлемнің алты бұрышында одан әрі желбіремек, – дей келе, облыс әкімінің орынбасары дене шынықтыру және спорт басқармасына нұсқаушылардың жұмысын қатаң бақылауға алуды тапсырды. Сондай-ақ, жоғары білімі жоқ, мамандығы басқа нұсқаушылар үшін қысқа мерзімді курстар ұйымдастыруды міндеттеді.
АРДА БИ
