Талдықорғандағы «Жастар» спорт кешенінде голбол спортынан облыстың ашық чемпионаты өтті. Жарыс облыстық спорт басқармасы, «Жетісу-Шабыты» мүгедектер қоғамдық бірлестігі және қаладағы мешіт қызметкерлерінің ұйытқы болуымен өңірімізде тұңғыш рет жалауын желбіретіп отыр. Көру қабілеті төмен жандар арасындағы айтулы бәсекеге бес аудан, екі қала және Атырау мен Оңтүстік Қазақстан облысынан жетпіске жуық спортшы қатысты.
Жарыстың салтанатты ашылу рәсімінде облыстық дене шынықтыру және спорт басқармасы, Ұлттық және бұқаралық спорт түрлерін дамыту бөлімінің басшысы Алмат Үшкемпіров:
– Елбасымыз өзінің жолдауында 2020 жылға дейін қазақстандықтардың отыз пайызын дене шынықтыру мен спортқа тарту керек екендігін айтқан. Біз бұл межеге жету мақсатында алдағы уақытта осындай жарыстарды көбірек өткізетін боламыз, — дей келе қатысушыларға жылы лебізін білдіріп, жарысты ашық деп жариялады.
Осыдан кейін Талдықорған қаласы орталық Иман мешітінің наиб имамы Керімбек Даутов салауатты өмір салтын насихаттау барысында ұйымдастырылып отырған шараның маңызы зор екендігін айтты. Сонымен қатар спортпен шұғылдану (садақ ату, суда жүзу, күрес) да пайғамбарымыз Мұхаммедтің (с.ғ.с) сүйікті амалы болғандығын жеткізіп, додаға түскелі тұрған спортшыларға сәттілік тіледі.
Голбол – сезімтал болуды талап етеді. Бұл Европа елдерінде жақсы дамыған спорттың бір түрі. Қазақстанда 2015 жылдан бері даму үстінде. Мұнда ойыншылар допты мүлде көрмейді, тек оның сылдыры арқылы ғана доптың қай бағытта келе жатқандығын болжап бағады. Үш ойыншыдан құралған әр команданың мақсаты – қарсыластарының қақпасына допты өткізу. Командалар жарыстың басталуын асыға күтті. Спортшылар мейлінше жақсы өнер көрсетуге тырысып бақты. Нәтижесінде, ұпай жағынан өзгелерден басым түскен Қарасай ауданының спортшылары топ жарды. Ал, екінші орын алматылықтарға бұйырса, Талғар ауданының намысын қорғап келген голболшылар үшінші орыннан көрінді. Жеңімпаздар мен жүлдегерлер медаль, кубок, диплом және бағалы сыйлықтармен марапатталды.
Данияр САҒЫНДЫҚ
