8 наурыз мерекесін әлемнің 32-і елі тойлайды. Соңғы жылдары кейбір дін ұстанатындар мейрамды басқа мағынаға икемдеп алғандай. Жыл сайын әлеуметтік желілерде осы туралы тақырыптар талқыланады. Дегенмен, осынау керемет шақ, мезгіл ауысып, бәйшешек гүл ататын кезге сәйкес келіп, адамдардың жанына шуақ сыйлап, бір-біріне жылулығын арттыратын игілікті мерекені тойламасқа болмас.
Назарларыңызға көктем мезгілінің айшықты мерекесіне арналған қызықты деректерді ұсынамыз.
Аталмыш мейрамның тарихына үңілсек, ең бірінші 1908 жылы Нью-Йоркте 15 мың әйел ереуілге шыққан. Олардың талаптары әйелдерді ерлермен бірге тең дәрежеде көру, дауыс беру шараларына қатысуға мүмкіндік беру еді. Екі жылдан кейін жұмысшы әйелдер жиынында Клара Цеткин 8 наурызды мереке ретінде атап өтуді ұсынды. Міне осыдан кейін 1911 жылы Швецария, Дания, Германия, Австрия елдері алғашқылардың бірі болып тойлады. Әйелдер мерекесін ежелгі Рим де атап өткен. Ол күні бас бостандығы бар әйелдер жолдастарынан сыйлық алса, күңдерге қожайын тарапынан демалыс берілетін. Біздің елімізде де бұл мереке кең көлемде аталып өтеді. Кеңес одағында 1966 жылы әйелдер алғаш мереке ретінде тойлай бастаған екен. Ол кезде жай ғана отырыс жасап, жеткен жетістіктерін сөз етіпті. Қазаққа бұл мереке сол кездерде сіңді десек те болатындай. Қазіргі таңда одақтан бөлініп тәуелсіздік алған барлық елдерде аталып өтеді. Бір қызығы мереке күнінде Мадагаскар елінің әйелдері ғана демалыс алып, еркектер жұмысқа барады екен. Бұл күннің ең танымал сыйлықтары шоколад пен гүлдер. Ал гүлдердің ішінде халықтың көп сатып алатыны – қызғалдақ гүлі.
Ер азаматтар өз жарына, жігіттер қыздарына: «Қандай сыйлық аламын», – деп бас қатыратын осы бір мереке өз деңгейінде аталып өтеді деген сенімдеміз. Бір қолымен бесікті, екінші қолымен әлемді тербететін әйелдер мен аналарымыз бір күн ғана емес жылдың әрбір күнінде құрмет етуге лайықты.
Думан КЕҢШІЛІК
