Қазақтың дарқан даласы татулық пен берекенің алтын бесігі іспеттес. Әлімсақтан қасиетті мекенге құт дарып, топырағына текті ұлт етек жайды. Сақ, ғұндардан бастау алып, көк түрік атанған ата-бабаларымыз мәдениеттің озық үлгісін танытып, ұлттық құндылықтарды дәріптеді.
Халқымыз бодандықтың қамытын киіп, басынан небір зұлматты жайттарды өткерсе де бүгінгі күнге есен-сау жетіп, еркіндіктің байрағын биіктен желбіретті. Дана да дара, батыр да баһадүр жұртымыздың қайсарлығын Қазыбек бидің:
Қазақ деген мал баққан елміз,
Ешкімге соқтықпай жай жатқан елміз.
Елімізден құт-береке қашпасын деп,
Жеріміздің шетін жау баспасын деп,
Найзасына жылқының
қылын таққан елміз.
Дұшпан басынбаған елміз, басымыздан
сөз асырмаған елміз.
Досымызды сақтай білген елміз, дәм-тұзын ақтай білген елміз, – деген сөзі-ақ аңғартады.
Әсіресе, ХХ ғасырдағы саяси қуғын-сүргіннің салдарынан жер аударылған өзге ұлт өкілдері ешбір бөтендік сезінбей, тамырын кеңге жайып өсіп-өнді. Жоқшылықтың кермек дәмін татып отырған қазақ халқы соңғы нанын бөлісіп, тар баспанасынан орын берді. Бір атаның баласындай еңбек етіп, барлық қиындықты бірлесе жеңді. Сол үшін де әртүрлі этнос өкілдерінің қазақ десе шығар жаны бөлек. Әлі күнге дейін алғыс айтып, шексіз ризашылығын білдіріп келеді. Атақонысына қайтып оралғандар да туған жеріне ат ізін салып, бабаларының басына топырақ салып тұрады.
Бүгінде Елбасы Нұрсұлтан Назарбаев көпұлтты мемлекеттің берекесін жарастырып қана қоймай, ғаламдық мәселелердің шешілуіне ықпал етіп, әлемді бірлікке шақыруда. Оның айқын дәлелі – ядролық қарудан бас тартып, әлеуметтік-экономикалық қал-ахуалдың жақсаруы. Келешекте де ұлан-ғайыр жерімізде ата-бабаның асыл мұрасын ұрпақтан-ұрпаққа жеткізу жолында аянбай еңбек етуге бар күш-жігерімізді саламыз. Өйткені, тәуелсіз Қазақстан – достықтың қара шаңырағы. Бейбіт елімізде оған барлық мүмкіндік бар.
Мәулен ӘНЕРБАЙ
