Біз, Алматы сән және дизайн колледжінің ұстаздары мен студенттері, Жетісу өңірінің бас газеті ретінде сіздердің назарларыңызды киелі ескерткіш деуге тұрарлық құнды жәдігерге аударғымыз келеді.
Колледжіміз Ұлы Жібек жолының бойындағы Райымбек даңғылында орналасқан. Соған орай Райымбек батыр мазарына да жақын тұрмыз.
Колледждің ауласында оқу орнының киесіндей тірі ескерткіш бар. Ол – кемі үш ғасыр жасаған алып емен ағашы. Еменді колледж студенттері ерекше қастерлейді, кие тұтады.
Студенттеріміздің үкілі үміті бар. Олар осы емен ағашын “Қазақстанның киелі жерлерінің географиясы” жобасына енгізіп, Райымбек батырдың есімімен байланыстырғысы келеді. Мәселен, алып емен ағашының “Райымбек батырдың қара емені” деген мәртебесі бекітілсе дейміз.
Елбасымыз “Болашаққа бағдар: рухани жаңғыру” атты бағдарламалық мақаласында “Туған жердің әрбір сайы мен қырқасы, тауы мен өзені тарихтан сыр шертеді… Талай аңыздар мен әңгімелер бар“ деді емес пе? Әлденеше ғасырмен құрдас бұл емен ағашы да сондай тарихқа куә емес деп кім айта алады?..
Колледж ауласындағы осы бір тарихи жәдігер тақырыбындағы эсселер мен студенттер шығармашылығынан алынған мына бір өлең жолдарына назар аударайық:
Қасиет, қасірет те бар басында,
Куәгер өтіп кеткен сол ғасырға.
¤сіп тұр алып емен аспан тіреп,
Біздің оқу орнының ауласында.
Шежірені қаттаған әргі-бергі,
Талай тарих, талай сыр жәдігері.
Ұлы Жібек жолының
бойында өскен
Райымбек қосынының куәгері.
Әлемдік тарихта осындай ұзақ жасаған емендерді адам есімімен байланыстыру дәстүрі бар. Төл тарихымыздың ауқымымен алып қарасақ, шығыстүркістандық қытай қазақтарының арасынан шыққан қоғам қайраткері Демежанның есіміне қатысты “Демежанның қара ағашы” деген халық қастерлеген дарақ болған. Ол туралы Қабдеш Жұмаділовтің “Соңғы көш” романынан оқыдық емес пе?
Оқу орнымыз ескі теміржол вокзалы мен әскери комиссариатқа жақын болғандықтан Ұлы Отан соғысына аттанған майдангерлер жақындарымен осы емен түбінде қоштасқан екен. Ол да күні кешегі тарих.
Біздің көкейкесті тілегіміз – өзіміз сөз етіп отырған алып емен ресми мәртебеге ие болса дейміз. Осы бір өзгеше жәдігерімізді “Қазақстанның киелі жерлерінің географиясы” жобасына енгізуге белсенді әрекет жасау қажет деп есептейміз.
Күлзия Ауқашова,
АСжДК оқытушысы, «Нұр Отан» БПҰ төрайымы, ҚР білім беру ісінің үздігі.
Любовь Лазарева,
колледждің тарих пәнінің оқытушысы, ҚР білім беру ісінің үздігі.
Айнагүл Қаскенова,
Нүргүл Қошқарбаева,
тарих және география пәндерінің оқытушылары.
