Қазақтың тұлпары шапса тұяғы тозатын, қыраны ұшса қанаты талатын ұлан-ғайыр даласына, құтты да қайырлы мекенге ежелден иелік еткен, еркіндік аңсаған ұлтымыздың ұлы да, ең асыл мұраты еңселі ел болып, әлемге қазақ деген жұрттың, Қазақстан атты мемлекеттің барын мойындату еді. Өткен ғасырдың тоқсаныншы жылдары сол ұлы мұрат орындалды. Қазақстан өз алдына дербес мемлекет атанды. Міне, одан да бері жылжып жылдар өтті. Ширек ғасырдан астам уақыт артта қалды. Қазақ елінің Тұңғыш Президенті, Ұлт көшбасшысы Нұрсұлтан Әбішұлы Назарбаевтың бастауымен замана көшіне ілескен қазақ елін төрткүл дүниенің төрт бұрышы түгел таныды, қаны бұзылмаған, қасиеті қашпаған қазақ деген өр мінезді ұлттың барын Біріккен Ұлттар Ұйымы төрінде отыратын алпауыт мемлекеттердің атақтары дардай басшылары да біліп, пікірімен санаса бастады.
Бағытын бағамдап, жеткенін саралап, барын бағалаған қашанда жүрісінен жаңылмайды, алға қойған мақсатын бағындырады дегендей, ата-бабаларымыздың жүздеген жылдармен өлшенетiн арман-аңсарының жүзеге асқан ақиқаты деп білетін Тәуелсіздікке қол жеткізген халқымыз жылдан-жылға әлемге өзінің оң табыстарын, өзінің алға үздіксіз ілгерілеуін паш етіп келеді. Сондықтан да егемендігіміздің әрбiр жылының бiз үшiн мәнi бөлек, маңызы айрықша. Ал Отанымыздың әрбір жетістігі – еліміздің әрбір азаматының мәртебелі мақтанышы. Біле білген адамға өмірдің әрбір сәті өнеге, әрбір кезеңі үлкен тәжірибе мектебі.
Тәуелсіздігіміздің алғашқы кезеңдерінде экономикамызды сауықтырып, халықтың әл-ауқатын түзеп алуға аса мән берілді. Одан кейін әлемдік саяси сахнадағы орнымызды нақтылап алып, кейінгі жылдар рухани тұрғыда жаңғыруға жіті мән бере бастадық. «Мәдени мұра» мемлекеттік бағдарламасының арқасында жоғалта жаздаған асыл мұраларымызды қайта қалпына келтіріп, түгендедік. Енді міне Елбасының жарқын бастамасын басшылыққа алып, «Рухани жаңғыру» бағдарламасы арқылы азаматтардың санасы сілкініп, тілдің тұсауын шешіп, жадыны жаңғыртып, құндылықтарды қайта оралта бастадық.
Бүгінде әлемде төрткүл дүниедегі жаһанданудың әсер-ықпалы тимеген ел сирек шығар?! Ғасырлар тоғысында, жаңа мыңжылдық межесінде жалғыз Қазақстан ғана емес, бүкіл әлем буырқанып, зор өзгерістерді басынан кешіруде. Осы көштен қалмауды мақсат еткен еліміз Тәуелсіздіктің 26 жылында кейбір мемлекеттер жүздеген жылда бағындырған асуларды абыроймен еңсеріп, биік белестерді бағындырдық.
Әрине, қазіргі ақпарат заманында кірпік қаққандай ғана уақыт болып саналатын жылдар барысында, жаһандық деңгейдегі жылдам өзгерулер мен мүлде жаңа жүйелердің қалыптасу кезеңін бастан кешіріп жатқан заманда, бүгінгінің қалыптасқан жүйесімен тоқтап қалмай, заман талабына сай келетін, дамыған елдермен терезесі тең мемлекет атануымыз біреулерге ертегі сынды көрінгенімен, бүгінгі күннің ақиқаты екенін көріп те, естіп те жүрміз. Енді осы биіктен аласармай, алға қарай қарыштай беру үшін үнемі жаңару мен жаңғыру жолында болуымыз қажет.
Тәуелсіз Қазақстанда мемлекеттік саясаттың табандылықпен, жүйелі де қарқынды жүргізіліп жатқандығының тағы бір нақты айғағы – Елбасының «Болашаққа бағдар: рухани жаңғыру» бағдарламалық мақаласының жарық көруі. Рухани жаңғыру – халқымыздың рухани кемелденуі мен өсіп-өркендеуіне ықпал ететін, тарихымыз бен болмысымызды түгендейтін, ұлттық салт-дәстүрімізді, тарихымыз бен әдебиетімізді басқаларға мойындатып, біліміміз бен бірегейлігімізді әлемге танытатын, ұлтқа серпін беріп, рухани жаңғыруына бастайтын бағдарламалық мақала, тың бағыт десек артық айтқандық бола қоймас.
Егемен елдің ұлттық рухын көтерудің маңызы зор. Бабалардан мирас болып, қанымызға сіңіп қалған ізгі қасиеттерді қайта түлетуіміз қажет. Біз үшін ұлттық рухты көтеру – маңызды міндет. Ұлттық рух – ұлтжандылық, отаншылдық, патриотизм, ол – мемлекетке адалдық, ол – қабылдаған заңдарға бағыну, бас ию. Міне, осы құндылықтарды жастардың бойына сіңіре білсек, онда құқықтық мәдениетті, Елбасы ерекше атап өткен ұлттық прагматизмді қалыптастыра алдық деп ауыз толтырып айтуымызға болады. Қоғамның экономикалық, əлеуметтік, мəдени дамуы жақсы деңгейде болса, адамдардың сана-сезімі де соған сай биіктей береді, жоғары дəрежеде болады. «Ұлттық бірегейлікті сақтау және нығайту – көп қырлы әрі жауапты міндет. Оны лайықты деңгейде іске асыру жаһандық өзгерістер заманындағы тұрақты дамудың кепілі. Тәуелсіздік жылдары Қазақстан ұлттық бірегейлік пен қазақ жерін мекендеген ұлттар мен ұлыстардың ынтымақ-бірлігін арттырудың өзіндік үлгісін қалыптастыра алды және бүгінгі таңда өзге мемлекеттер дамудың қазақстандық үлгісіне қызығушылық танытып, егжей-тегжейлі талдау жасауға кірісті.
Елдің тағдыры мен ертеңі – мемлекет құраушы ұлт ретінде қазақтың қолында болса, жарқын болашақтың кепілі болып табылатын тұрақтылық пен татулық, өзара түсіністік, құрмет пен сыйластық Қазақстанды мекен ететін барлық ұлт өкілдерінің берекесі мен бірлігіне байланысты. Болашағынан үміті бар мемлекет бүгіні мен ертеңін бірдей ойлайды, өткенін саралап, келешегін болжайды, алдына ұлы мақсаттар қойып, соған жетуге ұмтылады. Бұл ретте азаттықты аңсаған ата-бабамыздың арманына қол жеткізген жас мемлекетіміз өз алдына үнемі биік мақсаттар қойып, асқақ белестерді бағындыруға талпыныста боларына күмәнім жоқ.
Мәңгілік ел болу үшін Елбасының «Рухани жаңғыру» стратегиясында айтылған ұлттық ерекшелігімізді сақтау, озық дәстүрлерді ұстану, кежегені кері тартып, дамуымызға тежеу болатын жаман әдеттерден арылу, бәсекеге қабілеттілікке, білімпаз болуға ұмтылу, сананың ашықтығы және басқа да қадір-қасиеттерді жас ұрпақ өз бойына мықтап сіңіруі қажет. Ұлттың құндылығы саналатын барлық інжу-маржандарымызды теріп, жинап, ұрпақтан ұрпаққа табыстау — біздің мақсатымыз әрі парызымыз болуы шарт. Ұлы мемлекетке айналу жолындағы аға буынның қолға алған игі ісін жаңа сатыға көтеретін көзінде оты бар, елінің нағыз жанашыры, білімі мен ой-өрісі кең жастардың қолында екендігі баршаға ақиқат.
Адам өмір бойы үйренеді, ұдайы жетілу үстінде болады. Өсер елдің жастары өмірге өте құштар, білім алу, ғылым жолын қуу, әрдайым оқу мен іздену жолында жүреді. Қай заманда болмасын, табыстылықтың басты факторы – білім екендігі сөзсіз. Мемлекет пен мемлекеттің, адам мен адамның, ұлт пен ұлттың бәсекесі қызып тұрған мына заманда әлемдегі дамуы алдыңғы қатардағы мемлекеттермен тең дәрежеде болу үшін жастарымыздың білімі мен ғылымдағы жетістіктері бәсекеге қабілетті болуы қажет. Сондықтан да жастарымыз әрдайым сапалы білімді бірінші орынға қоюы тиіс. Себебі, құндылықтар жүйесінде білімді бәрінен биік санайтын ұлт қана табысқа жете алады. Осы тұста айта кетер болсақ, соңғы жылдары өңірімізде білім беру саласының дамуына мемлекет тарапынан ерекше қолдау жасалып келеді. Бұл өз кезегінде білімнің салтанат құрып, кеңінен қанат жаюына жол ашпақ. Өйткені сапалы білім беріп, саналы ұрпақ тәрбиелеу болашаққа жасалған басты инвестициямыз.
Елбасының «Болашаққа бағдар: рухани жаңғыру» атты бағдарламалық мақаласы бүгінде халық арасында кеңінен қолдау тауып, ұшқан құстың қанаты талатын кең байтақ атамекеніміздің түкпір-түпкірінде көптеген игі шаралардың өтуіне себепкер болып отыр. Жалпы болашаққа бағдар беретін әрі рухани жаңғыруға үндейтін бағдарламалық мақаланың маңызы күн санап артып, нұрлы болашақтың темірқазығына айналуда.
Тарих көшi ұзақ. Мұратымызға асықсақ та аптықпай жетейік. Тәуелсіздікті ұстап тұру оңай емес, ал оның келешегін кемелді ету одан да қиын. Бұл күнделікті тынымсыз еңбекті, жігерді, қажыр-қайратты, елдің әрбір азаматының осы бағыттағы жауапкершілігі мен нақты әрекетін талап етеді. Ынтымағымызды ыдыратпай, бiрлiгiмiздi жоғалтпай, әрбір істі жұмыла бiрiгіп атқарсақ, ауыр жүгiмiздiң жеңiлдерi анық.
Қазақстанның көп ұлтты халқының жұлдызы жоғары болатынына, туған елiмiзде дәулеттi де сәулеттi өмiр орнайтынына кәмiл сенімдімін. Өйткенi сөзiмiз – адал, iсiмiз – ақ. Ең бастысы Қазастанның бүгiннен нұрлы, бүгiннен де кемел болашағы бар, ал жастарының сол күнге деген берiк сенiмi бар.
Осындай алмағайып заманда Тәуелсіз ел ретінде көк туын биікке тіктеген еліміздің жарқын болашаққа жол тартқан көшін бәсеңдетпей, төрт құбыласын түгендеп, «Мәңгілік ел» болу жолындағы Ұлы мақсат — мүддеге жұмылуы, Ұлт Көшбасшысы Нұрсұлтан Әбішұлы Назарбаевтың салып берген егемен елдің тізгінін ұрпақтан — ұрпаққа мирас етіп табыстау – әрқайсымыздың бабалар алдындағы ұлы борышымыз екендігін жас ұрпақ терең түсінсе деген тілегім бар.
Алматы облысы әкімі баспасөз қызметінің
бас маманы Ожаров Қуаныш
