25 тамыз күні сағат 12.38-де «ЭКСПО – 2017» көрмесі үш миллионыншы қонағын қарсы алды. Ол Мәскеу қаласының тұрғыны, 38 жастағы Юрий Шурыгин. Астанаға іссапармен келген ресейлік азамат алдымен «Нұр Әлемді» тамашалағанын айта келіп, өз елінде де дәл осындай көрменің ұйымдастырылғанын қалайтынын жасырмады.
– Қазақстанның павильоны маған қатты ұнады. Әрине, мұндай ауқымды шараның бізде де өткізілгенін қалаймын. 2025 жылы ЭКСПО Екатеринбург қаласында өткізілуі мүмкін. Біз өз еліміз үшін жанкүйер боламыз, – деп мерейтойлық қонақ өз әсерімен бөлісті.
«Астана ЭКСПО – 2017» ҰК» АҚ басқарма төрағасы Ахметжан Есімов мерейтойлық конақты құттықтап, естелік сыйлықтар табыстады. Сондай-ақ, Ахметжан Есімов «ЭКСПО – 2017» көрмесіне келушілердің 15%-ын шетелдік қонақтар құрайтынын, соның ішінде ресейлік келушілердің басым екендігін тілге тиек етті.
– Көрменің басты мақсаттарының бірі – туристік саланың қарқынды дамуына ықпал ету болатын. Бұл мақсат орындалды. Жұмыс орындары көбейіп, табыс көлемі артты. Әсіресе, шағын және орта бизнес саласында мультиплекативтік әсер жақсы байқалды. Елордалық қонақүйлердегі меймандар саны екі есе көбейді. Дәл осындай жанданыс мейрамханалар мен қоғамдық тамақтану орындарында да байқалады, – деді Ұлттық компания басшысы.
Ахметжан Есімов Елбасының жақында «ЭКСПО – 2017» көрмесі нысандарын пайдалану жоспарын бекіткенін тілге тиек етті. Көрме жұмысы аяқталғаннан кейін ЭКСПО аумағында профилактикалық жұмыстар жүргізіліп, негізгі нысандардың жұмысы басталады. Еске салсақ, 24 тамызда көрменің басты нысаны – Қазақстанның Ұлттық павильоны «Нұр Әлем» нысанына миллионыншы келуші тіркелген болатын.
Айта кетелік, үш ай мерзімде көрмеге шамамен 2 миллион келуші тіркеледі деп жоспарланған еді. Дегенмен, бұл болжам екі айға жуық уақытта жүзеге асты. 4 тамыз күні көрме екі миллионыншы келушіні қарсы алған еді. Ол 34 жасар оралдық кәсіпкер Гайса Жумалиев болатын.
Көрменің үш миллионыншы келушісіне қошемет көрсету рәсімінде сөз сөйлеген «Астана ЭКСПО – 2017» Ұлттық компаниясы» АҚ басқарма төрағасы Ахметжан Есімов: «ЭКСПО үмітімізді ақтап шықты», – деген пікірін қуанышпен жеткізді.
– Жақында кәсіпкерлер тобы ЭКСПО жұмысын ұзартуды сұраған. Алайда халықаралық көрмелер бюросының регламенті үш ай. Шетелдік қатысушы елдердің бюджеттері бар, олар үш айға ғана қарастырылған. Сондықтан мерзімді ұзарту мүмкін емес. Осы тұста бұқаралық ақпарат құралдары арқылы көрме келушілеріне айтарым, халықаралық павильондарды көруге асығыңыздар, өйткені 10 қыркүйекте олар өз жұмысын аяқтайды, – деді ол.
EXPO – 2017 ресми аяқталғаннан кейін отандық бизнеске пайда табуға мүмкіндік береді. Жақында Президент көрмеден кейінгі қолдану тұжырымдамасын бекітті. ЭКСПО-ның кейбір нысандары мұра ретінде қалып, профилактикалық жұмыстан соң, кішігірім үзілістен кейін туристік нысандар ретінде қайта пайдалануға беріледі. Бірінші кезекте бұл басты нысан – «Нұр Әлем» павильонына қатысты. Жуырда оған 1 млн. адамның келгені белгілі болды. Меніңше, ол болашақта туристер тарапынан үлкен сұранысқа ие болады. Жаңа туристік нысан – туристерді тартатын орын. Айта кетсек, Париждегі Эйфель мұнарасына жылына 7 млн. адам келеді. Уақыты келгенде «Нұр Әлемге» де осыншама турист келеді деп болжануда. Қысқасы, ЭКСПО туризмнің дамуына түрткі болады. Оның толық нәтижесін көрме аяқталғаннан кейін көреміз.
Қажет АНДАС.
