ІІМ есірткі қылмысына қарсы іс-қимыл комитеті азаматтарға үндеу жасады, деп хабарлайды 7-su.kz желілік басылымы.
«Құрметті азаматтар! Жаңа түрдегі есірткі қауіптерінің тез таралуы мен жастарды заңсыз есірткі айналымына тартуда цифрлық арналардың қолданылуына байланысты біз қоғам ретінде балаларымызды, жақындарымызды және еліміздің болашағын қорғау үшін күшімізді біріктіруіміз қажет», – делінген үндеуде.
Комитет есірткі қылмыстарын, әсіресе кәмелетке толмағандарды тарту жағдайларын анықтау, жолын кесу және алдын алу бағытында белсенді жұмыс жүргізуде. Алайда бұл мәселе тек құқық қорғау органдарының күшімен шешілмейді.
Азаматтардан балалар мен жасөспірімдердің мінез-құлқындағы өзгерістерге мән беруге, күмән тудыратын интернет-ресурстарға, граффити мен жарнамалардағы белгісіз кодтарға назар аударуға шақырды.
«Біз әр өңір бойынша кері байланыс үшін телефон нөмірлерін қалдырамыз. Сіз маңызды ақпаратты анонимді және қауіпсіз түрде хабарлай аласыз. Бұл қылмыстың алдын алып, біреудің өмірін құтқаруға көмектесуі мүмкін. Кәмелетке толмағандарды есірткі ортасына тартуды азайту – бәрімізге ортақ міндет. Бейжай қалмай, белсенділік танытқан әр азаматқа алғысымыз шексіз», – деді ІІМ есірткі қылмысына қарсы іс-қимыл комитеті төрағасының міндетін атқарушы Данияр Мейірхан.
Фото: Polisia.kz
