Алдағы Дүниежүзілік қысқы студенттік универсиада ойындарының алауын тұтатып, дүбірлі жарыстың басталуына небары айға жуық уақыт қалды.
Халықаралық шаңғы федерациясының (FIS) күн тәртібіне сай Алматы қаласының дене шынықтыру және спорт басқармасы, Ұлттық штаттық командалар және спорт резерві дирекциясы, ҚР шаңғы жарысы Ұлттық федерациясы және 28-Дүниежүзілік қысқы универсиада дирекциясының ұйымдастыруымен жыл соңында «Алатау» шаңғы-биатлон кешенінде биатлоннан Қазақстан Республикасының чемпионаты өткізілді. Бұл спортшылардың қысқы Универсиада қарсаңындағы тестік жарысы болатын. «Ақ көрпе» жамылған Алатау баурайында еліміздің 10 аймағынан жиылған 100-ге жуық спортшы өзара бақ сынасты. Ақ қарға айшықты із қалдырған тартысты жарыста ерлер мен әйелдер спринт, ізгетүсу жарысы (пасьют), аралас эстафета, іріктеу кезеңі және ақтық бәсеке бойынша сынға түсті. Байрақты бәсекенің алғашқы күні жарыс жолына шыққан шаңғышылар спринт (классикалық) бағдарламасы бойынша өнер көрсетті. Нәтижесінде, қыздар арасындағы бәсекеде Елена Коломина жеңіс тұғырынан көрінсе, Анна Шевченко екінші орынды иеленді. Ал үздік үштікті Ирина Быкова қорытындылады.
Ерлер арасындағы жарыс қорытындысы бойынша Ақмола облысының спортшысы Денис Волотка алтыннан алқа тақса, Константин Борцов күміспен күптелді. Сөйтіп, бұл екі спортшы 2017 жылы Алматыда өтетін қысқы Универсиада ойындарына жолдама алды. Шаңғышы Әсет Дүйсенов болса қоланы қанағат тұтты.
Қазақстан Республикасы чемпионатының үшінші күнінде жарыс жолына шыққан әйелдер мен жасөспірімдер ізгетүсу жарысы бойынша бәсекелесті. Сонымен, 10 шақырымдық жарыста әйелдер арасында Шығыс Қазақстан облысынан келген спортшы Галина Вишневская жеңіс тұғырынан көрінсе, Дария Үсенова екінші орынға, Анастасия Кондратьева үшінші орынды місе тұтты.
Ал жасөспірімдер арасындағы бәсекеде Елизавета Бельченко алтыннан алқа тақса, Людмила Ахатова мен Евгения Красикова сәйкесінше күміс және қола жүлдегер атанды.
Төрт күндік жарыс қорытындысы бойынша алдағы 28-ші қысқы Универсиада ойындарына қатысып, шаңғы мен биатлон жарыстарында ел намысын қорғайтын саңлақ спортшыларымыздың есімдері анықталды. Жеңімпаздардың қатары көбейді. Олай болса, әлемнің әр түкпірінен келетін шаңғышылар арасындағы байрақты бәсекеде көк Туымыздың көкте желбіреуіне тілектестігімізді білдіреміз!
Талғар ауданы.
