Қазір қай өңірге барсаңыз да еңбектеніп, тер төккен жандардың ісіне қарап көз сүйсінеді. Осы арқылы ел еңсесінің тіктеліп, тұрмыс-тіршіліктерінің оңала бастағанын аңғарасың. Ауыл ажары айшықталып, заманауи үлгіде бой көтеріп жатқан нысан саны да аз емес.
Жаңа жолдар салынып, ескіргендерінің қайта жаңаланып жатқанына да куә боласың. Бір сөзбен айтқанда, әлеуметтік жағдай уақыт өткен сайын жақсарып келеді.
Аталған сала бойынша Балқаш ауданында да атқарылып жатқан өрелі істер аз емес. Аудандық жолаушылар көлігі және автомобиль жолдары бөлімі мемлекеттік мекемесінің басшысы Сейітжан Асылбектің берген мәліметіне жүгінсек, өңірге қарасты елді мекендердегі жолдардың жалпы ұзындығы 215 шақырымды құрайды. Биыл осыларды жөндеп, күтіп ұстау үшін бюджеттен 316 млн. теңгеден аса қаражат бөлінген. Қазіргі кезде бұл қаржы мақсатты жұмсалып, кәдеге жарап жатыр. Ішкі көшелер ғана емес, аудан аумағындағы облыстық маңызы бар жолдар да жасалуда. Ал оның жалпы ұзындығы 544 шақырым. Оны қалпына келтіріп, жөндеу үшін де қомақты қаражат қарастырылған.
Бүгінде Қапшағай – Бақанас – Қарой автокөлік жолының 280-294,8 шақырымы орташа жөндеуден өткен.
Оны «Дортехмонтажстрой» ЖШС еңбеккерлері жүзеге асырған. Ал «Сұңқар-Қаншеңгел-Топар-Құйған» автокөлік жолының 273-283, 326,5-344,5 шақырымына орташа жөндеу жүргізген мердігер «Балқаш жолдары» ЖШС бұл істі 409 млн. теңгеге жасаған.
Балқаш ауданына барған іссапар кезінде ескірген жолдардың жаңаланып жатқанын көрдік. Біз барған сәтте Бақанас ауылының шеткі көшесін жаңарту бойынша құрылыс істері қызу жүріп жатты. Жұмысшылар жолға тас төсеп, тегістеу ісімен айналысуда. Ауыл тұрғындарының айтуынша, бұған дейін ой-шұқыры көп бұл көшемен жүру мүмкін болмаған. Енді олар осы жолдың жасалып жатқанына қуанышты.
Жөндеу жұмысын «Балқаш жолдары» жауапкершілігі шектеулі серіктестігінің еңбеккерлері қолға алыпты. Мұнда атқарылып жатқан жұмыстар жөнінде учаске басшысы Келгентай Ошақбайұлы айтып берді. Күрделі жөндеуден өтіп жатқан жол құрылысына оннан аса адам тартылып, сегіз техника жұмылдырылған. Жұмысшылардың бәрі ауыл тұрғындары. Бүгінге дейін Бақанас ауылындағы күрделі жөндеуден өтуге тиіс бес көшенің үшеуі қайта жасалып, пайдалануға берілген. Қалғаны қыркүйек айының ортасына дейін аяқталады деп күтілуде.
Айгүл Байбосынова
Бақанас ауылы,
Балқаш ауданы.
