«Қазгидромет» синоптиктері Қазақстанның бірқатар облысында қолайсыз ауа райына байланысты ескерту жариялады. Кей өңірлерде желдің екпіні секундына 15-20 метрге дейін жетіп, жаңбыр мен қар жауады. Сондай-ақ тұман, көктайғақ және үсік жүреді. Бірнеше облыста жоғары және төтенше өрт қаупі сақталады, – деп хабарлайды 7-su.kz ақпараттық порталы.
Маңғыстау облысы
Облыстың батысы мен орталығында күндіз оңтүстік-шығыстан соғатын желдің екпіні 15-20 м/с болады. Өңірде жоғары, ал орталық бөлігінде төтенше өрт қаупі сақталады. Ақтауда да күндіз желдің екпіні 15-20 м/с-қа жетіп, жоғары өрт қаупі күтіледі.
Қызылорда облысы
Облыстың солтүстігі мен орталығында 3 градусқа дейін үсік жүреді. Өңір бойынша төтенше, ал солтүстік бөлігінде жоғары өрт қаупі сақталады. Қызылорда қаласында да төтенше өрт қаупі бар.
Алматы облысы
Таулы аудандарда тұман түседі. Солтүстік-шығыстан соғатын желдің екпіні облыстың оңтүстігі мен таулы аймақтарында 15-20 м/с болады. Түнде өңір бойынша 1-6 градус үсік жүреді. Облыстың батысы, оңтүстігі, шығысы мен орталығында жоғары өрт қаупі сақталады.
Алматы қаласында жоғары өрт қаупі бар. Қонаевта түнде 1-3 градус үсік күтіледі. Іле Алатауының Медеу және Бостандық аудандарына қарасты таулы аймақтарда тұман түсіп, солтүстік-шығыстан соғатын желдің екпіні 15-20 м/с-қа жетеді.
Түркістан облысы
Таулы аудандарда тұман болады. Солтүстік-шығыстан соғатын желдің екпіні күндіз 15-20 м/с-қа дейін күшейеді. Түнде облыстың батысында 1 градус үсік жүреді. Өңірдің солтүстігінде, батысында, орталығында және тау бөктеріндегі аудандарда жоғары өрт қаупі сақталады. Шымкентте де жоғары өрт қаупі бар. Түркістан қаласында түнде 1-3 градус үсік күтіледі.
Павлодар облысы
Жаңбыр мен қар жауады. Күндіз облыстың батысы мен оңтүстігінде аздаған жауын-шашын болады. Бұл аудандарда көктайғақ күтіледі. Солтүстік-батыстан соғатын желдің екпіні 15-20 м/с-қа жетеді.
Шығыс Қазақстан облысы
Жаңбыр мен қар жауады. Облыстың солтүстігі мен таулы аудандарында кей уақытта жауын-шашын қатты болып, көктайғақ жүреді. Түнде және таңертең солтүстік пен шығыста тұман түседі. Оңтүстік-батыстан және батыстан соғатын желдің екпіні облыстың батысы мен солтүстігінде 15-20 м/с болады.
Абай облысы
Жаңбыр мен қар жауады. Облыстың солтүстігі мен шығысында көктайғақ болады. Түнде және таңертең шығыс бөлігінде тұман түседі. Оңтүстік-батыстан және батыстан соғатын желдің екпіні батыс, солтүстік және орталық аудандарда 15-20 м/с-қа жетеді.
Солтүстік Қазақстан облысы
Облыстың солтүстігі мен шығысында жаңбыр мен қар жауып, көктайғақ болады. Батысы мен оңтүстігінде тұман түседі. Солтүстік-батыстан және батыстан соғатын желдің екпіні солтүстік, шығыс және оңтүстік аудандарда 15-20 м/с болады.
Қостанай облысы
Облыстың солтүстігі мен шығысында тұман түседі. Оңтүстігінде жоғары өрт қаупі сақталады.
Жетісу облысы
Таулы аудандарда тұман болады. Солтүстік-шығыстан соғатын желдің екпіні Алакөл көлдері ауданында 15-20 м/с-қа жетеді. Түнде облыс бойынша 4-9 градус үсік жүреді. Өңірдің шығысында төтенше, ал оңтүстігінде, батысында және орталығында жоғары өрт қаупі сақталады.
Талдықорғанда түнде 7-9 градус үсік күтіледі. Қалада жоғары өрт қаупі бар.
Қарағанды облысы
Облыстың батысы, солтүстігі мен шығысында тұман түседі. Батысында төтенше өрт қаупі сақталады. Қарағанды қаласында да тұман болады.
Батыс Қазақстан облысы
Облыстың солтүстік-батысында, батысында, оңтүстігінде және шығысында жоғары өрт қаупі сақталады.
Ұлытау облысы
Солтүстік және шығыс аудандарда тұман түседі. Облыстың батысы мен орталығында төтенше өрт қаупі бар. Жезқазған қаласында да төтенше өрт қаупі сақталады.
Жамбыл облысы
Таулы аудандарда тұман болады. Оңтүстік-шығыстан соғатын жел солтүстік-шығысқа ауысып, таулы аймақтарда екпіні 15-20 м/с-қа жетеді. Түнде облыс бойынша 1-6 градус үсік жүреді. Солтүстігінде, оңтүстігінде және шығысында жоғары өрт қаупі сақталады.
Атырау облысы
Облыс бойынша, соның ішінде Атырау қаласында төтенше өрт қаупі сақталады.
Ақмола облысы
Облыстың батысы мен оңтүстігінде тұман түседі.
