Бастауыш мектеп мұғалімі – ерекше тұлға. Ол – балалар мен үлкендер әлемінің арасындағы сарапшы. Бастауыш мектеп мұғалімінің еңбегін өзгемен салыстыруға болмайды, себебі бұл еңбектің жемісі – жан-жақты білімді, рухани тұрғыда жетілген жеке тұлға қалыптастырумен өлшенбек.
Мұғалімге отбасы мен қоғам ең қымбаттысын, өз елінің азаматының болашағын, оның тағдырын табыс етеді. Бүгінгі мұғалім еңбегі қандай болса, ертеңгі болашағымыз да сондай болмақ.
«Болашақта еңбек етіп, өмір сүретіндер бүгінгі мектеп оқушылары, мұғалім оларды қалай тәрбиелесе Қазақстан сол деңгейде болады. Сондықтан ұстазға жүктелер міндет ауыр», – деп Елбасы Н. Назарбаев айтқандай, қазіргі заман мұғалімінен тек өз пәнінің білгірі ғана емес, тарихи-танымдық, педагогикалық-психологиялық сауаттылық, саяси-экономикалық білімділік, ақпараттық сауаттылық талап етілуде. Ол заман талабына сай білім беруде жаңалыққа жаны құмар, шығармашылықпен жұмыс істеп, оқу мен тәрбие ісіне еніп, оқытудың жаңа технологиясын шебер меңгерген мұғалім болуы тиіс.
Мұғалім әрқашанда өзін қоғам талабына сай үздіксіз тәрбиелеп отыратын, адамдармен, әсіресе, оқушылармен қарым-қатынас жасай білетін, ұйымдастырушылық қабілеті жоғары, өз пәнін жетік білетін, таланты мен тәжірибесі тоғысқан, қоғамдық-саяси өмірге белсенді араласып, өз елі мен жеріне сүйіспеншілігі негізінде оқушыларға үлгі бола білуі керек.
Білім беру мен тәрбиелеудің негізі – ұстаз. Қазіргі таңда шығармашылық ізденістегі педагогикалық жаңа әдістерді жете меңгерген, кәсібилігі қалыптасқан педагог аса қажет. ХХI ғасырдың ұстазы жаратылыстану мен гуманитарлық ғылымдар бойынша біліммен терең сусындаған, ой-өрісі кең, жан дүниесі бай тұлға болуы шарт.
Жанна Абдилданова,
Н. Алдабергенов атындағы орта мектептің бастауыш сынып мұғалімі.
Балпық би ауылы,
Көксу ауданы.
