Талдықорған қаласындағы “Жастар” спорт сарайында “Спорт – есірткіге қарсы” ұранымен “J LEAGUE” жобасының ресми ашылу салтанаты өтті. Бұл іс-шара Жетісу облысында алғаш рет ұйымдастырылып отыр.
Шараның басты мақсаты – жасөспірімдердің спортқа деген қызығушылығын арттырып, оларды салауатты өмір салтына баулу. Сонымен қатар, жастар арасында есірткі және басқа да зиянды әдеттерге қарсы иммунитет қалыптастыру көзделген.
Жобаның ашылу салтанатына 1200-ден астам жас қатысып, түрлі спорттық белсенділіктерге атсалысты. Салтанатты рәсім барысында Жетісу облысы полиция департаменті бастығының орынбасары Жасұлан Байкенов сөз сөйлеп, нашақорлықтың жастар өміріне тигізетін зияны жайлы ескертті. Ол өз сөзінде есірткіге тәуелділіктің қоғам үшін үлкен қауіп екенін және спорттың бұл мәселемен күрестегі маңызды құрал екенін атап көрсетті.
Фото: Видеодан алынған кадр
