Қазақстан Республикасының Қорғаныс министрлігіне қарасты әскери оқу орындарында оқыған бұрынғы курсанттар енді оқуын қайта жалғастыру үшін өтінімді онлайн түрде бере алады. Бұл қызмет eGov.kz электронды үкімет порталы арқылы қолжетімді, деп хабарлайды 7-su.kz ақпараттық порталы Электронды үкіметтің ресми сайтына сілтеме жасап.
Қызмет қалай көрсетіледі?
Жаңадан іске қосылған қызмет арқылы бұрынғы курсанттар:
-
eGov.kz порталына кіріп, тіркеледі;
-
«Азаматтарға» > «Әскери есепке алу және қауіпсіздік» > «Әскери қызмет» бөлімдеріне өтеді;
-
«Қазақстан Республикасы Қорғаныс министрлігінің әскери оқу орындарына қалпына келтіру» қызметін таңдайды;
-
«Қызметке онлайн тапсырыс беру» батырмасын басады;
-
Оқу орнын таңдап, оқудан шығарылғаннан бері қанша уақыт өткенін көрсетеді;
-
Жеке деректерін пайдалануға келісім береді, мекенжайын көрсетіп, қажет құжаттарды тіркейді;
-
ЭЦҚ немесе басқа қол қою әдістерінің бірімен өтінішке қол қояды.
Қандай артықшылықтары бар?
-
Қызмет тегін көрсетіледі;
-
Кемінде бір семестр оқығандар ғана пайдалана алады;
-
Бұрынғыдай қағаз жүзінде құжат жинаудың қажеті жоқ — жүйе көптеген деректерді автоматты түрде мемлекеттік дерекқордан жүктейді;
-
Қызмет нәтижесі өтініш берушінің жеке кабинетінде көрсетіледі.
Маңызды!
-
Өтініш беру құқығы оқу орнынан шығарылғаннан кейін 1 жыл ішінде ғана жарамды.
-
Өтінімді қарау мерзімі – 20 жұмыс күні.
-
Егер оң шешім қабылданса, пайдаланушы электрондық нұсқада жауап алады. Қалпына келтіруге мүмкіндік болмаса, жүйе дәлелді бас тарту хатын жолдайды.
Қызмет кімдердің ынтымақтастығымен іске қосылды?
Жаңа қызмет ҚР Цифрлық даму, инновациялар және аэроғарыш өнеркәсібі министрлігінің Мемлекеттік көрсетілетін қызметтер комитеті, «Ұлттық ақпараттық технологиялар» АҚ және Қорғаныс министрлігінің бірлесуімен іске қосылды.
