Істі Жетісу облысының қылмыстық істер жөніндегі мамандандырылған ауданаралық соты қарап жатыр. Айыпталушылар орындығында тоғыз адам бар, олардың бірі – кәмелетке толмаған.
Өткен сот отырысында
Шерзат Полаттың әкесі Қаржаубай Нұрымовтың адвокаты Мейірман Шекеев іске байланысты ілеспе тағы бір қылмыстық іс қозғалғанын мәлімдеді.
Қылмыстық іс 29 сәуірде болған оқиғаға байланысты тіркелген. Сол күні адвокат Шекеев өз көлігінен дөңгелек бұрандаларының жоғын байқап, бұл әрекетті қастандық ретінде бағалаған. «Жолда жүргенде бұл өте қауіпті жағдай, оны құдай білсін – кездейсоқтық па, әлде әдейі ме», – деген болатын ол.
Адвокат Талдықорған қалалық полиция басқармасында бұл дерекке қатысты қылмыстық іс қозғалғанын хабарлады. Сонымен қатар, өзінің мобилографын қорқыту әрекетіне байланысты да тергеу басталған.
Еске сала кетейік, 21 мамырда өткен сот отырысында басты айыпталушы Абзал Шынасылдан жауап алынған. Сол отырыстан кейін эфирде тараған диалог пен күліп шыққан сәт қоғам тарапынан қатты сынға ұшыраған еді.
Қазіргі уақытта сот ісі жалғасуда.
