– Мектеп – өмірдің алғашқы баспалдағы. Онда берілген білім мен тәрбие өмірлік ұстанымға әсер етіп, өзін қалыптастыру жолында айрықша рөл атқарады. Бұл алтын ұямыздан құрметті азаматтар көптеп шығып, ел дамуына үлес қосып жатыр. Екінші дүниежүзілік соғыста айрықша ерлігімен есте қалған 28 панфиловшылардың бесеуі біздің ауданнан болғаннан кейін бұрын Гвардия ауданы болып, мектепке И. Панфиловтың есімі берілді. Дәл осындай шараны ұйымдастырып жатқан мектеп ұжымына алғысымды айтамын, – деді өз сөзінде мектеп түлегі Әдіқадыр Наубаев.
Рас, мектеп мақтаныштарына айналған түлектер Сенат депутаты Сұлтан Дүйсембинов, ғылым докторы Ерасыл Әбілқасымов, философия ғылымдарының кандидаты Болат Байқадамов, профессор Майдан Сәтқалиев ел алдында абыройлы қызметімен көзге түсті.
Жиналғандар арасынан Омск (Ресей) қаласынан арнайы келген Панфилов атындағы орта мектептің алғашқы түлегі Александр Варениковпен аз-кем тілдестік. Сөз арасында көзіне үйіріліп келген жасты да байқадық. «Ауылға келмегеніме 25 жылдан асыпты. Шақырту келгенде бірден ойланбадым. Балалық шағым өткен жерлерді көріп, сағынышпен еске алдым. Достық, махаббат, бәрі шынайы уақыт қой. Мектеп сонысымен құнды», – деді ақсақал. Әңгіме арасында өзінің жарының сыныптас болғандығын және бүгінгі басқосуға келе алмағандығын да айтты.
Панфилов мектебі республикалық және облыстық түрлі байқаудан олжалы оралып жүр. Бүгінде мектепте 350 оқушы білім алса, 50 ұстаз жұмыс істейді.
– Дәл осындай түлектер кездесуі мектебімізде алғаш рет ұйымдастырылып отыр. Шарамызға Ресей, Белоруссия, Германия сынды алыс-жақын елдерден 1965 жылдан 2025 жылға дейін бітірген 200-ден астам түлек қатысып отыр. Бұл зор қуаныш. Негізі мақсат – үлкен мен кіші арасындағы байланысты нығайтып, атаулы датаны айрықша өткізу, – дейді мектеп директоры Әлихан Құдарбек.
Серік ҚАНТАЙ
Кербұлақ ауданы
