Оның айтуынша, Қазақстанда ЖИ – сәнді тренд емес, стратегиялық құрал ретінде қарастырылады.
«Біздің мақсат – адамды алмастыру емес, оның қабілетін интеллектуалды шешімдермен күшейту», – деді министр.
Қандай мамандықтарға қауіп төніп тұр?
ЖИ ең алдымен күнделікті, қайталанатын жұмыстарды автоматтандыруға мүмкіндік береді. Осыған байланысты алдағы уақытта мынадай мамандықтардың азаюы мүмкін:
-
Колл-орталық операторлары
-
Кассирлер
-
Архив қызметкерлері
-
Бухгалтерлер
Мұндай мамандықтарды ЖИ жүйелері жылдамырақ, арзанырақ және қателіксіз орындай алады.
Қауіп емес – мүмкіндік
Министрдің айтуынша, жасанды интеллект өнеркәсіп, тау-кен өндірісі, құрылыс және металлургия салаларында да қолданыс табуда. Мұндай жағдайда адамның рөлі қауіпті өндірістерден алыстап, басқару, инженерлік және бақылау қызметтеріне ауысады.
«ЖИ жарақат алу қаупін азайтып, адамның еңбегін қауіпсіз әрі интеллектуалды етуге жол ашады», – деді ол.
1 миллион азаматты оқыту жоспары
Министр еңбек нарығындағы өзгерістер біртіндеп болатынын атап өтті. Осыған орай, мамандарды қайта даярлау мен оқыту шаралары басталып кеткен. Басты мақсат – 1 миллион азаматты жасанды интеллект саласына бейімдеу.
«Біз тек жастарды емес, түрлі саланың мамандарын қамтимыз. Жаңа жағдайларға бейімделуге мүмкіндік беруіміз керек», – деді ведомство басшысы.
Жаңа мамандықтар пайда болады
ЖИ технологиялары жаңа кәсіптерді де өмірге әкеледі. Олардың қатарында:
-
Дерек талдаушы (data analyst)
-
Машиналық оқыту инженері
-
Өнеркәсіптік робот операторлары
-
ЖИ жүйелерін тестілеуші мамандар
Министрдің айтуынша, басты міндет – болашақты болжау емес, оған қоғамды бейімдеу.
«Жасанды интеллект – бұл қауіп емес, жаңа мүмкіндіктердің көзі. Қазақстан бұл өзгерістерге тек бейімделіп қоймай, белсенді қозғаушы күшке айналуы керек», – деді Жаслан Мәдиев.
