Мемлекеттік әлеуметтік қолдау шараларын шын мәнінде мұқтаж азаматтарға дер кезінде әрі әділ жеткізу басты басымдыққа айналды. Осы орайда Қазақстан Республикасы Еңбек және халықты әлеуметтік қорғау министрлігі Отбасының цифрлық картасының (ОЦК) жұмыс істеу қағидаттарын жан-жақты түсіндіруді жалғастырып келеді, – деп хабарлайды 7-su.kz ақпараттық порталы.
Қарапайым тілмен айтқанда, Отбасының цифрлық картасы дегеніміз – түрлі мемлекеттік органдардың 30 ақпараттық жүйесіндегі мәліметтерді автоматты түрде біріктіріп, әрбір шаңырақтың әлеуметтік жағдайын шынайы бағалауға мүмкіндік беретін заманауи талдамалық жүйе. Жүйенің алгоритмдері қарапайым тұрғындардың мүддесін қорғауға бағытталған. Мәселен, күнделікті ұсақ шығындар мен ескі мүліктің отбасының тұрмыс деңгейін негізсіз жоғарылатып көрсетуіне жол берілмейді.
Мамандардың айтуынша, жүйе отбасының әл-ауқатын есептеу кезінде бірқатар маңызды жеңілдіктерді ескереді. Атап айтқанда, бюджеттен төленетін мемлекеттік жәрдемақылар, алимент, тұрғын үй көмегі, бала тууына байланысты біржолғы төлемдер және қайырымдылық қаражаты отбасының табысы ретінде саналмайды. Сонымен қатар жеке баспанасы жоқ, шағын пәтерде тұратын немесе апатты, тозығы жеткен үйде өмір сүретін азаматтар үшін бағалау баллы төмендетіледі. Пайдалану мерзімі 20 жылдан асқан ескі жеңіл автокөліктер, тракторлар мен комбайндардың құны нөлге теңестіріліп, есепке мүлде алынбайды. Сол сияқты шағын жер телімдері, бақша алқаптары, аз ғана мал мен құс ұсталатын үй шаруашылығы, «Отбасы банкіндегі» тұрғын үй құрылыс жинақтары және банк карталарындағы шағын қаражат отбасы мәртебесіне кері әсер етпейді. Егер отбасында ипотекалық кредит немесе ұзақ мерзімді қарыз болса, сондай-ақ мүгедектігі бар не ауыр дертке шалдыққан жандар тәрбиеленсе, жүйе автоматты түрде төмендету коэффициенттерін қолданады.
Ал жоғары табыс пен қаржылық дербестік өлшемдері мүлде бөлек қарастырылады. Егер отбасының әрбір мүшесіне шаққандағы табыс 3 күнкөріс минимумынан асса, меншігінде қымбат автокөліктер немесе 5 жылдан аспаған коммерциялық техника болса, сондай-ақ бірнеше пәтер, дүкен, сауда үйі мен дәріхана тіркелсе, онда әл-ауқат деңгейі жоғары деп бағаланады. Бұдан бөлек, қала мен ауыл тұрғындарының жағдайын теңестіру үшін арнайы «ауылдық коэффициент» енгізілген. Ауылдық жерлердегі үйлер мен дүкендердің ауданы ірі қалалармен салыстырғанда әлдеқайда төмен көрсеткішпен есептеледі.
Отбасының цифрлық картасы барлық деректерді ай сайын автоматты түрде жаңартып отырады. Цифрлық бағалау тетіктері әлеуметтік әділеттілікті орнатып, көмектің нағыз зәру азаматтарға бағытталуына сенімді кепіл болады.





