Ауылдың тыныс-тіршілігіне етене араласып, өзінің еңбекқорлығымен алғыс арқалап жүрген Совет Ақанұлы негізінен Көксу ауданы, Еңбекшіқазақ ауылында дүниеге келген. 1991-1993 жылдары әскери борышын Тәжік-Ауған шегарасында өтеген. Ауған соғысының ардагері.
Совет Ақанұлы адамгершілігі мен қарапайымдылығы болмысынан білініп тұратын салмақты мінез иесі. Көптің көкейіндегі сұраққа өзінің іскерлігімен жауап беретін оны округке қарасты 4 ауылдың тұрғындары құрметтейді.
Кейіпкеріміз талай жыл аталған әкімшілікте заңгер болып еңбек еткен. Өзінің білімі мен парасатын, елге деген жанашырлығын көрсеткен ол бүгінде ауыл әкімінің орынбасары міндетін арқалап жүр.
«Ауылына қарап, азаматын таны» демекші, ауыл әкімі Ғабит Қаһарманұлымен бір мақсатта, бір мүддеде қызмет етіп келе жатқан кейіпкеріміз Ынтымақ, Қорғас, Ават, Атамекен ауыл тұрғындарына бар жағдайды жасап отыр. Ауылдағы ардагер ұстаздарға, дәрігерлерге арнап мерекелік іс-шараларды өз уақытында өткізуге мұрындық болумен қатар көп балалы, жағдайы төмен отбасы мүшелеріне қайырымдылық жасауды да азаматтық парызым деп біледі. Өзі де көп балалы, зайыбы екеуі 5 бала тәрбиелеп өсірді. Еңбегі бағаланып, Мақтау қағаздарымен, Алғыс хаттарымен марапатталған.
Елді мекендерде орын алатын түрлі жағдайлардың басы-қасында күндіз-түні бел шешпей Совет Ақанұлы жүреді. Біз секілді қарт адамдардың, жалпы зейнеткерлер мен тұрғындардың ризашылығына бөленіп жүрген жанның отбасына, жұмысыне береке тілейміз.
Тоқтаргүл Киізбаева
Атамекен ауылы,
Панфилов ауданы
