Қазақстандық теннисші, жарыстың 3-ракеткасы Елена Рыбакина Вашингтонда өтіп жатқан халықаралық турнирдің екінші айналымында 18 жастағы канадалық Виктория Мбоконы жеңіп, ширек финалға шықты. Матч 6:3, 7:5 есебімен Рыбакинаның пайдасына шешілді.
Бәсеке бір сағат 25 минутқа созылды. Осы уақытта Елена 3 эйс жасап, 9 брейк-пойнттың төртеуін тиімді пайдаланды. Ал қарсыласы Мбоко 3 эйс пен 2 брейк жасағанымен, жеңілістен құтыла алмады.
Ширек финалда Рыбакина әлемнің 24-ракеткасы, польшалық Магдалена Френх пен тәжірибелі америкалық Винус Уильямс арасындағы матчтың жеңімпазымен кездеседі. Айта кетейік, 45 жастағы Винус жуырда ғана кортқа оралған.
Жүлде қоры 1,2 миллион АҚШ долларына бағаланған Вашингтон турнирі 27 шілдеде мәресіне жетеді. Бұған дейін Елена Рыбакина жұптық сында да ширек финалға жолдама алған болатын.
