Қазақстан Республикасы Еңбек және халықты әлеуметтік қорғау министрлігі төрт күндік жұмыс аптасын енгізудің жалақыға ықпалы туралы түсініктеме берді, – деп хабарлайды 7-su.kz ақпараттық порталы.
Министрліктің Еңбек және әлеуметтік әріптестік департаменті басқармасының басшысы Шалқар Оразбековтің айтуынша, Қазақстанда төрт күндік жұмыс аптасын енгізуге заң жүзінде 2015 жылдан бастап рұқсат етілген. Сонымен қатар, 2023 жылы қабылданған Әлеуметтік кодекс аясында да мұндай жұмыс форматының мүмкіндігі бекітілген.
«Еңбек кодексіне сәйкес, жалақы орындалған жұмыс көлеміне пропорционалды түрде төленеді. Сондықтан аптадағы жұмыс күндерінің саны қысқарса, жалақы мөлшері де сәйкесінше азаяды«, – деді Шалқар Оразбеков Орталық коммуникациялар қызметіндегі брифинг барысында.
Дегенмен, басқарма басшысы жұмыс беруші жұмыс күндерінің қысқаруына қарамастан, жалақы көлемін толық сақтауға құқылы екенін атап өтті. Бұл жағдайда, оның айтуынша, заңбұзушылық болмайды және бұл Еңбек кодексіне қайшы келмейді.
Айта кетейік, төрт күндік жұмыс аптасы бүгінде әлемнің бірқатар елінде пилоттық жоба немесе тұрақты тәжірибе ретінде енгізілген. Қазақстанда да мұндай жүйе кейбір мекемелер мен жеке секторда тәжірибе түрінде қолданылып келеді.
