Елімізде өзін-өзі жұмыспен қамтығандар саны 2,1 миллион адамға жетті. Бұл туралы Үкімет отырысында Еңбек және халықты әлеуметтік қорғау вице-министрі Асқар Биахметов мәлім етті, деп хабарлайды 7-su.kz ақпараттық порталы .
Вице-министрдің айтуынша, 2025 жылдың бірінші жартыжылдығының қорытындысы бойынша еңбек нарығында тұрақтылық сақталған, ал жұмыссыздық деңгейі 4,6% мөлшерінде тұр.
– Жұмыспен қамтылған халықтың өсімін жалдамалы жұмысшылар қамтамасыз етті. Қазір олардың саны 7,1 миллион адамға жетіп отыр. Ал өзін-өзі жұмыспен қамтығандар саны – 2,1 миллион адам, – деді Асқар Биахметов.
Вице-министр еңбек нарығындағы негізгі үрдістерге де тоқталды:
-
Цифрландыру және автоматтандыру – қазіргі кәсіптердің басым бөлігі цифрлық дағдыларды талап етеді.
-
Платформалы жұмыспен қамту және электрондық сауда – адамдардың көбі онлайн-платформалар арқылы жұмыс істейді, фриланс және e-commerce салаларына бет бұрған.
-
Халық санының өсуі – соның салдарынан жыл сайын еңбек нарығына жастардың келуі артып жатыр.
– Болжам бойынша, 2035 жылға дейін еңбек нарығына жыл сайын 360 мың адамға дейін қосылуы мүмкін. Бұл еңбек ресурстарына деген сұранысты арттырады, – деп түсіндірді вице-министр.
