Ұйымдастырушылардың сөзінше, Талдықорған қаласы әкімдігінің қолдауында өткен бұл шараның басты мақсаты – спорт арқылы адам саудасына қарсы қоғамда батыл көзқарас қалыптастыру және жұрт арасында салауатты өмір салтын ұстануды кеңінен насихаттау. Облыс орталығындағы «Көктем» скверінен бастау алған кешкі велошеруге қатысушылар жалпы 6 шақырымдық жол басқан. Олардың арасында аймақтағы кәсіби велосипедшілер, мемлекеттік қызметкерлер және қарапайым қала тұрғындары бар.
Жиналған жұрт алдында сөз алған Талдықорған қалалық дене шынықтыру және спорт бөлімінің басшысы Жаннұр Әбішев велошеруге қатысуға келген белсенді қауымға алғыс айтып, ізгі тілегін жеткізді.
– «Спорт денсаулық кепілі. Осыған байланысты бүгінде Талдықорған қаласында көптеген спорттық нысандар жұмыс жасауда. Онда спортты жанына серік еткен әр азамат спорттың кез келген түрімен жаттығуына болады. Сонымен қатар шаһарда көптеген жаттығу және аулаларда спортық алаңдар салынуда. Бұл аймақ тұрғындарының салауатты өмір салтын ұстанып, бұқаралық спорттың жан-жақты дамуына мол мүмкіндік береді. Әрі мұндай шаралар бұдан былай да жалғасатынын болады», –дейді спорт бөлімінің басшысы.
Шара аясында велошеруге қатысушылар арасында лоторея ойындары ойнатылып, жеңімпаздарға бағалы сыйлықтар табысталды.
Айдын КӘЛІМХАН
