Ел мен жердің көркеюіне еселі еңбегімен атсалысып жүрген жандардың бірі – Бұлбұл Жұмаханқызы. Ол Жансүгіров ауылдық округінің тазалығына жылдар бойы үлес қосқан қарапайым еңбек адамы.
Бұлбұл апай таңнан кешке дейін ауыл көшелері, гүлзарлар, қоғамдық орындарды таза ұстауға күш жұмсаған еңбек адамы. Жұмысшылардың арасында тиянақтылығы және жауапкершілігімен көпке үлгі. Ол қасындағы адамдарды да тыңғылықтылыққа үйретеді.
Жуырда еңбек демалысына шыққан Бұлбұл Жұмаханқызы аудан, ауыл әкімдігі мен әріптестері қошемет көрсетті. Округ әкімі Ілияс Мұсабаланов Алғыс хат табыстап, ұзақ жылғы адал еңбегі, адамгершілік қасиеті, ауылды абаттандырудағы үлесі үшін ризашылық білдірді. Шапан жауып, гүл шоғын сыйлады.
Округ әкімінің орынбасары Сағит Жанғазыұлы: «Бұлбұл апай – қарапайым еңбектің қадірін арттырған адам. Бүгінгі ұрпаққа үлгі боларлық еңбекқор жан», – деп атап өтті. Ақсулықтардың бұл игілікті ісі құптарлық жайт. Еңбекті бағалау – еңбек адамына көрсетілер құрмет. Қарапайым еңбек иелерін насихаттау – жастардың бойына еңбекқорлық пен жауапкершілік дәнін себудің ең ұтымды жолы.
Жансүгіров ауылының әр жерінде «Тазалық – жинағаннан емес, шашпағаннан», «Сана тазармай дала тазармайды», «Ұялмайтын ауыл болайық» деген сөздер жазылып, ілінген. Мың адамның көшеге лақтырған қоқысын бір адамның таңның атысы, күннің батысы белі қайысып жинап жүргенін ескере бермейтініміз өкінішті. Бүгінгідей іс-шара көпті ойландыратыны сөзсіз.
Еңбекті бағалау – еңбек адамына көрсетілер ең үлкен құрмет. Бұлбұл Жұмаханқызы сол құрметке әбден лайық жан, үндемей жүріп-ақ қоғамға өлшеусіз күш жұмсады. Еңбекқор жандардың еңбегін бағалайық!
Гүлжан ТҰРСЫН
