Таиландта өтіп жатқан U19 және U22 жас аралығындағы алғашқы тарихи Азия чемпионатында қазақстандық боксшы Алина Құдайгенова жартылай финалға жолдама алды.
60 келіге дейінгі салмақта шаршы алаңға шыққан отандасымыз Оңтүстік Корея өкілі Джихье Хонмен кездесіп, төрешілердің бөлінген шешімімен жеңіске жетті. Қайсар қарсыласқа қарамастан, Алина өзінің техникалық және тактикалық артықшылығын дәлелдей білді.
Турнир ережесіне сәйкес, жартылай финалға жолдама алған спортшылар автоматты түрде кемінде қола медаль иеленеді. Осылайша Алина Құдайгенова Қазақстан қоржынына Азия чемпионатынан кезекті жүлде салды.
Алина Құдайгенова бұған дейін де Азия деңгейіндегі жарыста топ жарған. Биыл Шри-Ланканың Коломбо қаласында өткен IBA және ASBC ұйымдастырған Азия чемпионатында алтын медаль жеңіп алған боксшы енді World Boxing аясындағы жарыста да жеңіс тұғырынан көрінуге ниетті.
Жастар арасындағы бұл құрлықтық турнир 11 тамызға дейін жалғасады. Чемпионатқа 25 мемлекеттің үздік спортшылары қатысуда.
«Жетісу-Ақпарат»
