Болгария астанасы София қаласында өткен ITF Juniors турнирінің J30 сериясы аясында 16 жастағы қазақстандық теннисші Иван Пономарев жасөспірімдер арасындағы алғашқы халықаралық титулына қол жеткізді, деп хабарлайды 7-su.kz ақпарттық порталы.
Жарыстың жұптық сынында Пономарев швейцариялық серіктесі Чарли Базилмен бірге финалдық матчта жеңіске жетті. Қазақстандық-швейцариялық дуэт тартысты кездесуде украиналық Родион Четвериков пен болгариялық Самуил Пешевті 4:6, 6:3, 10:7 есебімен тізе бүктірді.
Бұл Пономарев үшін ITF деңгейіндегі алғашқы чемпиондық атақ. Бұған дейін ол Марокко мен Қытайда өткен жарыстарда финалға дейін жетіп, жақсы нәтижелер көрсеткен болатын.
Қазіргі таңда Иван Пономарев Латвияда тәжірибелі жаттықтырушы Андис Юшканың жетекшілігімен жаттығуда. Жас спортшының бұл жетістігі – қазақстандық теннистің жас буын өкілдері арасында өсіп келе жатқан жаңа таланттың дәлелі.
