Мұндай сүйінші ақпаратты Еңбек және халықты әлеуметтік қорғау министрлігі мәлім еткен. Олардың сөзінше, осы жылы бюджет қызметкерлері арасында құтқарушылардың, балабақша тәрбиешілерінің және орманшылардың айлығы көтеріледі, деп хабарлайды 7-su.kz ақпараттық порталы Qazaq Today сайтына сілтеме жасап.
Еңбек және әлеуметтік қорғау министрлігі мәліметінде құтқарушылардың жалақысы 70%-ға өсетіні жайлы деректер бар. Ал мемлекеттік орман күзеті қызметінде істейтін жұмысшылардың айлығы бірден 100%-ға көтерілмек.
Еске салайық, биыл қаңтарда мектепке дейінгі білім беру ұйымдарының педагогтарына 1,3 түзету коэффициенті енгізілген еді. Сол себепті, балабақша тәрбиешілерінің табысы да 30%-ға артады деп болжанған.
Сонымен қатар, бірнеше өңірдің әкімшілігі айлығы төмен қызметкерлерді қолдау шараларын қолға алуға мәжбүр. Яғни, жергілікті бюджеттің жайын ескеріп, олардың жалақысын 5%-дан 100%-ға дейін көтеруді қамтамасыз етеді.
Еңбек вице-министрі Асқарбек Ертаев Қазақстанда бюджет қызметкерлерінің еңбек ақысын төлеу бірыңғай жүйесі жұмыс істейтінін алға тартады. Демек, айлық-жалақыны көтеру туралы шешім бюджет пен экономикадағы жағдайды ескеріп барып қабылданбақ.
Министрлік соңғы бірнеше жылда педагогтар мен дәрігерлердің жалақысы айтарлықтай артқанын айтады. Сондай-ақ, техникалық қызметкерлер, мұрағат жұмысшылары мен кітапханашылар айлығы да шамамен екі есе өскенін мәлімдеп отыр.
