Жауапты үрдісте әлжуаз әлеуметтік санатқа мемлекет қолдауы зор. Биыл Жетісу облысы бойынша «Мектепке жол» акциясы аясындағы көмекпен 16 000-нан аса оқушы қамтылады. Сонымен қатар, ҚР Үкіметінің қаулысына сәйкес, жергілікті бюджеттен 1 млрд. 166 млн. теңге бөлініп отыр. Бұл сома 25 229 баланың мектепке дайындығына жұмсалады. Әрбірінің ата-анасына мемлекеттен 46 228 теңгеден қаражат беріледі.
Бүгінгі күнге Ақсу, Көксу, Кербұлақ аудандарына 100% аударым жасалыпты. Қалған қала, аудандарда 15 тамызға дейін толық аяқтау жоспарлануда. Бұл тізімге аз қамтылған және көпбалалы отбасылардың балалары кіреді.
«Мектепке жол» акциясын ұйымдастыру және өткізу бойынша өңірлік іс-шаралар жоспары бекітіліп, кәсіпкерлік және индустриялық-инновациялық даму басқармасы, аудандық, қалалық әкімдіктер мен білім бөлімдеріне акция тұжырымдамасына сәйкес аудан, қаланың орталық және ірі сауда орындарында мектеп тауарларын төмендетілген бағамен сату бойынша қайырымдылық мектеп жәрмеңкелерін ұйымдастыру туралы хаттар жолданыпты. Акция аясында облыстық басқармалар мен департаменттерге көмек қажет ететін 136 баланың тізімі жинақталған.
Айта кетелік, жаңа оқу жылына аймақтың педагогикалық ұжымдары да қызу дайындық үстінде. Жетісу облысында 315 мектеп, 16 мыңнан аса педагог жұмыс істейді. Соңғы ақпаратқа сәйкес білім мекемелерінде кейбір пәндер бойынша кадр тапшылығы бар.
– Бүгінге 51 штаттық орын бос тұр. Жалпы облыста 16 мыңға жуық педагог маман жұмыс істейді. Математика, орыс тілі, бастауыш сынып мұғалімдері мен инклюзивті сала мамандары, яғни, логопед, дефектолог, психолог жетіспейді, – дейді облыстық білім басқармасы басшысының орынбасары Қайрат Қасымов.
Медет ЖҰМАБАЙ
