Қазақстан намысын қорғайтын спортшылардың дені халықаралық аренада өз есімдерін қалыптастырған қыз-жігіттер. Бұл жөнінде толық ақпарат берген Спортты дамыту дирекциясының баспасөз қызметі мәлімдеді. Атап айтсақ, джиу-джитсудан жазғы Азия ойындарының чемпионы Нұржан Батырбеков, әлем чемпионы Әбу-Бәкір Жәнібек, Нұрсұлтан Дүйсенқұлов, Аслан Қанатбек, Сейілхан Болатбек бар. WKF каратэден тұңғыш әлем чемпионы Мөлдір Жаңбырбай, Токио Олимпиадасының қола жүлдегері Софья Берульцева, Дидар Әмірәлі, Қайсар Алпысбай, Нұрқанат Әжіқанов, Әсел Қанай қатысады. Спорттық құзға өрмелеуден жазғы Олимпиада ойындарының қатысушылары Ришад Хайбуллин, Әмір Маймұратов, Дамир Токтаров, Бекнұр Алтынбеков бақ сынайды. Ең көп спортшымыз (9) спорттық самбо мен жауынгерлік самбоға тіркелген. Олардың қатарында Маржан Бизақ, Маратбек Рахметоллин, Бақытжан Дүйсембеков, Аружан Кенесары, Құралай Кабрайқызы, Ниетхан Төлеухан, Тәңірберген Тергеубеков, Айнұр Ақжігітова, Ұлбосын Әділова бар. Спорттық акробатикадан Даниель Диль, Вадим Шуляр, Илларион Мацымоха, Алиса Котова өнер көрсетеді. Садақ атудан Роксана Юнусова, ушудан Ислам Каримов, муайтайдан Руслан Заякин ел намысын қорғайды.
Айта кететіні, биылғы тізімде 2022 жылы АҚШ-тың Алабама штатының Бирмингем қаласында өткен XI Дүниежүзілік ойындарының жүлдегерлері де бар. Бұл тізімге каратэден топ жарған Софья Берульцева және спорттық акробатикадан қола жүлдегерлер Даниель Диль, Вадим Шуляр енген.
Ал XII дүниежүзілік ойындарының ұраны – «Шексіз спорт, сансыз ғажайыптар». Бұл ұран Чэнду қаласы ұсынатын спорт түрлерінің кең ауқымы (рекордтық 35 спорт) мен сан алуан әсерлерді бейнелейді. Жарыстың бойтұмарлары ретінде Шубао пандасы мен Цзиньцзай маймылы таңдалған. Дизайнерлер тобы бұл сирек кездесетін екі жануардың бейнесін мәдени тасымалдаушы ретінде пайдаланып, Чэндудың экологиялық тұрғыдан таза, жылы әрі достыққа толы қала ретіндегі келбетін көрсетуге тырысқан. Дүниежүзілік ойындар 1981 жылдан бастап әр 4 жылда бір рет, Олимпиада ойындарынан кейін тұрақты ұйымдастырылады.
Дүниежүзілік ойындар бастапқыда тек Олимпиада бағдарламасына кірмейтін спорт түрлерінен өткізілсе, қазіргі сәтте 4 жылдықтың басты бәсекесіндегі спорт түрлері де қосылды. Қазақстан құрамасы Дүниежүзілік ойындарға 1993 жылдан бері қатысып келеді. Осы аралықта отандастарымыз 6 алтын, 4 күміс, 7 қола жүлде алды. Ең үздік көрсеткішіміз әзірге (1 алтын, 2 күміс, 1 қола) 2022 жылы АҚШ-тың Алабама штатының Бирмингем қаласында тіркелген еді.
